Rannsókna- og þróunarmiðstöð Háskólans á Akureyri hefur gert mat á samfélagsáhrifum nýs vegar um Dynjandisheiði fyrir Vegagerðina. Markmið rannsóknarinnar samkvæmt verksamningi var að meta áhrif af tilkomu heilsársvegar yfir Dynjandisheiði á samfélag og byggð á því svæði sem rannsókn þessi tekur til. Gefin forsenda er að jarðgöng milli Arnarfjarðar og Dýrafjarðar, svokölluð Dýrafjarðargöng, verði samtímis til staðar. Þannig kæmust á heilsárs samgöngur milli norðanverðra og sunnanverðra Vestfjarða....
Meira

Aðgerðahópurinn Áfram vestur segir Dýrafjarðargöng bæði nauðsynleg og óhjákvæmileg til að efla byggðina á Vestfjörðum með því að tengja byggðarlög saman og stækka atvinnusvæðin. Þetta kemur fram í umsögn hópsins um tillögu til þingsályktunar um fjögurra ára samgönguáætlun fyrir árin 2009-2012. Þar er minnt á að Alþingi samþykkti 13. maí 2000 sérstaka þingsályktun um jarðgangaáætlun fyrir árin 2000-2004. Í nefndaráliti samgöngunefndar segir: „Með jarðgöngum má rjúfa vetrareinangrun, stækka atvinnu- og þjónustusvæði og tengja saman byggðarlög með þeim hætti að skilyrði skapist fyrir eflingu byggðar og hagstæða íbúaþróun." Hópurinn segir að unnið hafi verið samkvæmt þessari samþykkt. Jarðgöng milli Reyðarfjarðar og Fáskrúðsfjarðar eru löngu búin og jarðgöng milli Siglufjarðar og Ólafsfjarðar eru á lokastigi, en þessi göng voru sérstaklega tilgreind í þingsályktuninni....
Meira

Trúbadorinn Svavar Knútur mun spila á Veitingahorninu á Þingeyri í kvöld. Skemmtunin byrjar milli 20 og 20:30 og aðgangseyrir er 1000 kr.

Dýrafjarðardagar verða með veglegra móti þetta árið og æ fleiri atriði bætast við dagskrána. Sunnudaginn 4. júlí kl. 16:30 mun Vilborg Davíðsdóttir rithöfundur halda erindi á Veitingahorninu um bók sína Auði Djúpúðgu og sýna myndir frá sögusviði hennar. Umfjöllunina er hægt að tengja við víkinga og landnámsöld. Þá ætlar leiklistarhópurinn Morrinn að frumsýna barnaleikrit á Víkingasvæðinu laugardaginn 3. júlí kl. 14:30. Einnig er athygli vakin á að ballinu, sem verður haldið í Félagsheimilinu á föstudagskvöldið, hefur verið flýtt um klukkustund. Það byrjar kl. 21:00 en ekki kl. 22:00 eins og áður hefur verið auglýst. Uppfærða dagskrá Dýrafjarðardaga má sjá hér.

Bæjarráð Ísafjarðarbæjar leggur til við bæjarstjórn Ísafjarðarbæjar að kauptilboði Ólafs Ragnarssonar að upphæð 75.000 krónur í fasteignina Fjarðargötu 35a á Þingeyri verði tekið. Aðeins eitt tilboð barst í fasteignina en það var tekið fyrir á fundi bæjarráðs á mánudag. Auglýst hafði verið eftir tilboðum í húsið og var umsóknarfrestur til 20. júní.

Fjölskyldudagur Verkalýðsfélags Vestfjarða var haldinn í ágætu veðri á víkingasvæðinu á Þingeyri á laugardag. Félagsmenn og fjölskyldur áttu þar ánægjulega samverustund við ýmsa leiki sem íþróttafélagið Höfrungur á Þingeyri stóð fyrir. Bauð félagið þeim sem vildu upp á siglingu í víkingaskipinu Vésteini og þáðu nokkrir boðið. Félagið gaf öllum þeim sem sóttu fjölskyldudaginn höfuðskjól eða „buff" með merki félagsins og að vanda var boðið upp á grillaðar pylsur og gos.

Frá þessu er greint á vef VerkVest.

Ítrekað hafa verið unnin skemmdarverk á lóð leikskólans Laufáss á Þingeyri. „Það eru einstaklingar sem virðast ekki getað notið lóðarinnar eins og hún kemur fyrir, heldur þurfa að rífa upp grasþökur, brjóta flöskur og skemma lása, svo fátt eitt sé nefnt. Nú er svo komið að ítrekað, núna í júnímánuði 2010, hefur einhver/einhverjir reynt að kveikja eld inni í leiktækjunum. Matjurtagarðurinn sem börnin eru að rækta hefur verið skemmdur, þessum fáu matjurtum sem settar voru niður hefur verið dreift um alla lóð og tré rifin upp með rótum. Sígarettustubbar, tyggjóklessur, rusl og drasl, finnast hér aftur og aftur svo ekki er alltaf um að ræða ung börn í þessu sambandi," segir í opnu bréfi sem Elsa María Thompson leikskólastjóri hefur ritað Dýrfirðingum og birt hefur verið á Þingeyrarvefnum....
Meira

Stefnt er að því að halda félagsmót Hestamannafélagsins Storms dagana 16. og 17. júlí í þeirri von að hestar verði þá í standi til að taka þátt í keppni. Ákvörðun þess efnis var tekin á aðalfundi félagsins þann 15. júní í Reiðhöllinni á Söndum en eins og flestum er kunnugt eru margir hestar landsins með hestapestina svokölluðu, sem er smitandi kvefpest og hefur einnig komið í hross hér fyrir vestan. Áhugi var þó meðal félagsmanna að stefna á mót um miðjan júlí.
Áhugasömum er bent á vef félagsins.