Á páskadag verður hátíðarguðþjónusta í Þingeyrarkirkju kl. 9:00. Að guðsþjónustu lokinni verður boðið upp á morgunverð í félagsheimilinu. Í Mýrakirkju verður hátíðarmessa kl. 14:00 á páskadag. Frá þessu er sagt á vef Þingeyrarprestakalls.

Íþróttafélagið Höfrungur stendur fyrir leikjadegi í íþróttahúsinu á Þingeyri á morgun, laugardaginn 30.mars, milli kl. 10:00 og 15:00. Farið verður í ýmsa leiki og þrautir, og meðal annars leitað að páskaeggjum. Kl. 15:00 ætlar Dýrfirðingurinn Guðni Páll Viktorsson að mæta í íþróttamiðstöðina og kynna fyrirhugaða ferð sína í kringum landið á kayak. Mætum öll og höfum gaman saman!

Simbahöllin verður opin um páskana, frá og með fimmtudeginum 28.mars (skírdag) til sunnudagsins 31.mars (páskadags). Kaffihúsið verður opið alla dagana frá kl. 12:00 - 18:00 en auk þess verður barinn opinn frá kl. 20:00 til miðnættis á skírdag, og frá kl. 20:00 á laugardagskvöld. Gestir geta meðal annars gætt sér á súpu, belgískum vöfflum, kökum, kaffi og fleiru góðgæti. Þá fer hið árlega páskabingó fram í Simbahöllinni á laugardag kl. 21:00, þar sem spennandi verðlaun eru í boði, og á sunnudag verður boðið upp á harmonikkutónlist frá kl. 14:00. Hér er hægt að fylgjast með Simbahöllinni á Facebook.

Einmánuður, síðasti mánuður vetrar, hefst nú á þriðjudegi  20. til 26. mars en 10. mars til 16. mars í gamla stíl fyrir 1700. 
Fyrsti dagur einmánaðar er nefndur í elstu heimildum í tengslum við hreppssamkomu þar sem meðal annars var skipt fátækratíund. 
Einmánuður er helgaður piltum og harpa stúlkum á sama hátt og húsbændur og húsfreyjur áttu þorra og góu. Fyrsti dagur einmánaðar hefur verið kallaður  “yngismannadagur”  á síðustu öldum, og áttu stúlkur að fagna honum. Sagt er að votur einmánuður boði gott vor. ...
Meira

Góuþræll er nefndur síðasti dagur góu og var í gamansemi að ánafna hann þeim konum sem með einhverjum hætti þóttu hafa gert sig berar að lauslæti. 
Áður og fyrr höfðu menn illan bifur á góuþrælnum vegna veðurfars, einkum á Suðurlandi.  Annálar á 17. öld minnast oftsinnis á illviðri og mannskaða á góuþræl. 

Mjög slæmt þótti að góuþrællinn færi saman við boðunardag Maríu 25. mars enda orti Bólu-Hjálmar: 

Vottur er það varla góðs 
veðurátt mun kælin 
þá boðunarhátíð besta fljóðs 
ber á góuþrælinn.

Átta liða úrslitin í Spurningakeppni átthagafélaganna í gærkvöldi voru æsispennandi og eru Dýrfirðingar enn á glæsilegri sigurbraut. 

Nú bíða allir spenntir eftir fjögurra liða úrslitunum en þá munu keppa liðin sem sigruðu í gærkvöldi:
 
Skaftfellingafélagið - Breiðfirðingafélagið
Norðfirðingafélagið - Dýrfirðingafélagið

Í kvöld, fimmtudaginn 21. mars 2013, mætast þau átta lið sem komust áfram úr fyrri umferðum. 
Keppnin fer fra í Breiðfirðingabúð í Reykjavík, Faxafeni 14 - ofan við Bónus- og hefst kl. 20:00
Verum dugleg að mæta og hvetja okkar lið, nágranna eða aðra þá sem við höldum með af einskærri tilviljun!
Aðgangseyrir 500 krónur

Í kvöld keppa:
Húnvetningafélagið - Norðfirðingafélagið
Árnesingafélagið - Breiðfirðingafélagið
Skaftfellingafélagið - Átthagafélag Sléttuhrepps
Dýrfirðingafélagið - Átthagafélag Héraðsmanna

Nú er komið að hinni árlegu árshátíðar sýningu Grunnskólans á Þingeyri
Árshátíðarsýningar nemenda verða sem hér segir:

Fimmtudaginn 21. mars kl. 10:00 - fyrri sýning
Fimmtudaginn 21. mars kl. 19:30 - seinni sýning
AÐGANGSEYRIR ER 1000 KR. FYRIR 16 ÁRA OG ELDRI.
DAGSKRÁIN TEKUR U.Þ.B. 2 KLST.
Vonandi sjáum við sem flesta
Nemendur G.Þ.