Veraldarvinir (á landsvísu) héldu samkeppni um bestu ljósmyndina 2009 á Íslandi. Allir sjálfboðaliðar máttu senda 3 myndir í keppnina og þeir greiddu svo sjálfir atkvæði til bestu myndanna í tveimur flokkum. Það er gaman að segja frá því að fallegustu myndirnar úr báðum flokkum voru teknar í Dýrafirði. (Smellið á myndina með fréttinni til að stækka).

Veraldavinir Vestfjarða voru stofnuð árið 2008 og eru systurfélag Veraldavina. Í samtökunum starfa sjálfboðaliðar alls staðar að úr heiminum fyrir sveitafélög, stofnanir og aðra opinbera aðila. Síðasliðið sumar voru meðal annars hópar sem unnu við endurbætur á elstu skólabyggingunni á Núpi og hreinsun strandlengjunnar í Dýrafirði......
Meira

Eins og þið sjáið er komin nýr Þingeyrarvefur, breyttur og bættari. Snerpa á Ísafirði hefur unnið að þessum breytingum síðustu vikur og á Sturla Stígsson, starfsmaður Snerpu, mikið hrós skilið.

Síðan er ennþá í vinnslu svo það er ýmislegt sem á eftir að koma inn eins og t.d. afmælisbörn dagsins. Þau verða á sínum stað. Eins á eftir að setja inn fleiri myndir sem birtast hérna efst, upplýsingar um Þingeyri og sitthvað fleira. Það sem er nýtt á síðunni er t.d. atburðadagatalið hérna til hliðar. Þarna geta allir skráð atburði og ég hvet ykkur eindregið til þess. Undir „Dýrfirðingurinn" vinstra megin á síðunni verða viðtalsbrot við Dýrfirðinga heima og að heiman, og myndir af nýfæddum Dýrfirðingum heima og að heiman...

...
Meira

Karlakórinn Ernir heldur sína árlegu jólatónleika í byrjun desember. Ókeypis er á tónleikana að vanda og segir Sigmundur Þórðarson, ritari kórsins, að Ernir líti á tónleikana sem jólagjöf til samfélagsins. Guðrún Jónsdóttir, sópransöngkona, syngur einsöng með kórnum að þessu sinni. Stjórnandi kórsins er Beata Joó og undirleikari Margrét Gunnarsdóttir. Fyrstu tónleikarnir verða í Félagsheimilinu á Þingeyri miðvikudaginn 2. desember, þann 3. desember syngur kórinn í Safnaðarheimilinu í Bolungarvík og föstudaginn 4. desember verða tónleikar í Ísafjarðarkirkju. Allir tónleikarnir hefjast klukkan 20.00.

Staðarprestakall og Þingeyrarprestakall sameinast. Heiti hins sameinaða prestakalls verður Þingeyrarprestakall. Prestssetur verði á Þingeyri. Þetta var samþykkt á kirkjuþingi sem lauk í gær. Að auki var samþykkt sú breyting að Súðavíkur-, Vatnsfjarðar- og Ögursóknir munu héðan af tilheyra Holtsprestakalli og að Hólmavíkurprestakall færist frá Húnavatnsprófastsdæmi til Vestfjarðaprófastsdæmis. Séra Leifur Ragnar Jónsson, sóknarprestur á Patreksfirði, var fulltrúi presta á Vestfjörðum á kirkjuþinginu. Hann segir það hafa verið vonlausa baráttu að reyna að standa á móti breytingunum. Fjárhagslegur niðurskurður innan þjóðkirkjunnar sé svo gífurlegur að það hafi ekki verið möguleiki að bjarga þessu embætti....
Meira

Ólafur Helgi Kjartansson og Hafliði Magnússon lásu upp úr bókum sínum á vestfirskri bókakynningu sem haldin var í Sunnlenska bókakaffinu á Selfossi í gærkveldi. Þar fluttu einnig létta tónlist; Vestfirðingarnir Pétur Bjarnason frá Bíldudal og Ólafur Sæmundsson frá Patreksfirði. Öll lögin sem sungin voru höfðu texta Hafliða Magnússonar. Sérstakur gestur á vestfirsku bókakynningunni var Hallgrímur Sveinsson á Þingeyri, hinn dugmikli framkvæmdastjóri Vestfirska forlagsins og ávarpaði hann samkomugesti.
Hægt er að sjá fleiri myndir hér sem Guðmundur J. Sigurðsson tók í Sunnlenska bókakaffinu í gærkveldi.

Uppselt er á tvö kvöld af fimm á jólahlaðborði á Hótel Núpi í Dýrafirði. Fyrsta kvöldið fer fram 28. nóvember en næstu jólahlaðborð eru haldin 4. og 5. desember og er uppselt á það síðarnefnda. Síðustu kvöldin fara fram 11. og 12. desember og er einnig uppselt á það síðarnefnda. Veislustjórn verður í höndum þriggja valinkunna manna. Sigmundur Þórðarson ríður á vaðið en Kristinn H. Gunnarsson stýrir veislunni á næstu tveimur kvöldum. Þórhallur Arason sér svo um veislustjórnina á síðustu tveimur kvöldunum...
...
Meira

Vestfirska forlagið á Þingeyri gefur út tíu nýjar bækur á þessu ári og eru þær allar komnar í dreifingu. Meðal höfunda í ár eru vestfirsku Sunnlendingarnir sem búa á Selfossi þeir; Hafliði Magnússon frá Bíldudal og Ólafur Helgi Kjartansson frá Ísafirði. Þeir eru báðir með söfn af smásögum. Ólafur Helgi með bókina "Ný von að morgni" sem eru tíu sýslumannssögur að vestan. Hafliði er með bókina "Þá verð ég farinn" sem eru 11 smásögur en Oddur Björnsson telur Hafliða fyndnasta höfund landsins.
Ólafur Helgi og Hafliði munu lesa upp úr bókum sínum á vestfirskri bókakynningu sem haldin verður í Sunnlenska bókakaffinu á Selfossi föstudaginn 13. nóvember n.k. kl. 20:30 Þar munu einnig koma fram og flytja létta tónlist; Vestfirðingarnir Pétur Bjarnason frá Bíldudal og Ólafur Sæmundsson frá Patreksfirði. Öll lögin sem leikin verða og sungin eru við texta Hafliða Magnússonar en hann verður að teljast einn af fjölhæfustu alþýðulistamönnum þessa lands.
Sérstakur gestur á vestfirsku bókakynningunni verður Hallgrímur Sveinsson á Þingeyri, hinn dugmikli framkvæmdsstjóri Vestfirska forlagsins. Fangaverðir og Hrútavinir á Suðurlandi fóru skemmti- og menningarferð um Vestfirði í sumar og nutu gestrisni og leiðsagnar Hallgríms á Þingeyri og í Dýrafirði.
...
Meira

Talið er að umferð á Vestfjarðarvegi nr. 60 muni aukast nokkuð í kjölfar framkvæmda við jarðgangagerð milli Arnarfjarðar og Dýrafjarðar. Umferðin verður þó hvergi nær heilsárshúsum en nú er og mun hún að hluta til færast fjær Þingeyri og bæjum í sunnanverðum Dýrafirði. Vegurinn verður auk þess fjær íbúðarhúsum við Mjólkárvirkjun. Vestfjarðavegurinn mun færast nær eyðibýlinu Kjaransstöðum en verður um 140 m fyrir neðan bæinn. Áhrif hávaða frá umferð eru talin verða óveruleg. Þetta kemur fram í frummatsskýrslu sem lögð hefur verið fram til kynningar....
Meira