Uppselt er á tvö kvöld af fimm á jólahlaðborði á Hótel Núpi í Dýrafirði. Fyrsta kvöldið fer fram 28. nóvember en næstu jólahlaðborð eru haldin 4. og 5. desember og er uppselt á það síðarnefnda. Síðustu kvöldin fara fram 11. og 12. desember og er einnig uppselt á það síðarnefnda. Veislustjórn verður í höndum þriggja valinkunna manna. Sigmundur Þórðarson ríður á vaðið en Kristinn H. Gunnarsson stýrir veislunni á næstu tveimur kvöldum. Þórhallur Arason sér svo um veislustjórnina á síðustu tveimur kvöldunum. Boðið verður upp á skemmtidagskrá í lok borðhalds sem heitir Athyglisbrestur og aukaslag og er í höndum Árna Brynjólfssonar á Vöðlum.

Þar mun hann fara yfir farinn veg á árinu sem er að líða og gera grín að mönnum og málefnum. Að dagskrá tæmdri verður dansleikur með Hjónabandinu eins langt fram á nótt eins og menn hafa þol til. Boðið er upp á rútuferðir og tilboð á gistingu fyrir þá sem vilja. Áhugasömum er bent á að hægt er að leita upplýsinga og panta miða í síma 456 8235.