Árshátíð Grunnskólans á Þingeyri verður haldin í Félagsheimilinu á morgun, fimmtudag. Tvær leiksýningar verða á árshátíðinni; sú fyrri er kl. 10:00 en þá munu jafnframt börn frá leikskólanum Laufási flytja söng- og dansatriði, og sú seinni er kl. 19:30.
Aðgangseyrir er 600 kr. fyrir fullorðna.
Vonumst til að sjá sem flesta!

Meirihluti bæjarráðs Ísafjarðarbæjar hefur samþykkt að gildandi samningur um skólaakstur í Dýrafirði verði framlengdur um eitt ár, með þeim fyrirvara, að samkomulag náist um lækkun kostnaðar. Á síðasta bæjarráðsfundi var rætt um endurskoðun á samningum um skólaakstur, útboð eða framlengingu samninga, þar sem tekið væri tillit til breytinga, sem orðið hafa m.a. á fjölda nemenda. Bæjarfulltrúinn Arna Lára Jónsdóttir lét bóka að hún teldi rétt að farið yrði í útboð á skólaakstri í Dýrafirði.

Fyrirtækið Urð og grjót ehf., átti lægsta tilboð í framkvæmdir við Mjólká III, en tilboð í verkið voru opnuð í dag. Í verkinu felst bygging nýs stöðvarhúss og inntaks við núverandi stíflu í norðaustur enda Prestagilsvatns í Arnarfirði, sem og dýpkun og mótun inntaksskurðar í Prestagilsvatni og lagning þrýstipípu á milli nýja inntaksins og stöðvarhússins með frárennsli í Borgarhvilftarvatn. Tilboð Urðar og grjóts ehf., sem er með aðsetur í Reykjavík, hljóðaði upp á kr. 70.387.000.- sem er 57% af kostnaðaráætlun. Geirnaglinn ehf., á Ísafirði bauð næst lægst eða kr. 93.920.860.-, eða 77% af kostnaðaráætlun og Vestfirskir verktakar ehf., á Ísafirði voru með þriðja lægsta tilboð, kr. 99.557.700.- eða 81% af kostnaðaráætlun......
Meira

5 krakkar frá Grunnskólanum á Þingeyri héldu til Reykjavíkur í síðustu viku og kepptu í Skólahreysti fyrir hönd skólans. Krakkarnir stóðu sig frábærlega og lentu í 3 sæti í sínum riðli, aðeins hálfu stigi á eftir Grunnskóla Bolungarvíkur. Lið Grunnskólans á Ísafirði sigraði með nokkrum yfirburðum.
Blómey Karlsdóttir vakti mikla athygli því hún náði langbesta tíma dagsins í hreystigreipi, sem snýst um að hanga sem lengst í slá. Auk þess var Blómey með þriðja besta tímann af öllum 110 skólunum sem kepptu í Skólahreysti 2010.
Frá þessu er sagt á vef Grunnskólans á Þingeyri.

Þrjátíu og fimm manns tóku þátt í fjórðu göngu Ferðafélags Ísafjarðar um helgina. Hópurinn hittist á hlaðinu við Núpsskóla í Dýrafirði. Þaðan var gengið sem leið liggur inn að kirkju og messaði Sæmundur Þorvaldsson frá Læk í Dýrafirði yfir göngugörpunum og rakti stuttlega sögu staðarins og þeirra sem þar bjuggu. Þá var haldið inn í Skrúð þar sem garðurinn var skoðaður og saga hans rifjuð upp. Þá var haldið yfir að Læk og gengið yfir stíflumannvirkin til að komast yfir Núpsá. Sæmundur rakti þar fyrir hópinn söguna á staðnum og þá merku virkjun sem þar hefur verið í tugi ára......
Meira

Húsfyllir var á þjóðháttakynningu um æðarbúskap og refaveiðar. Valdimar Gíslason æðarbóndi á Mýrum í Dýrafirði lýsti þróun véla við hreinsun dúns og hvernig búskapurinn hefði þróast frá 1936 fram til dagsins í dag. Hann sagði jafnframt skemmtilegar sögur af viðureign manna við refi. Sigríður Hanna og faðir hennar Sigurður Eiríksson sögðu frá búskapnum í Norðurkoti í Sandgerði og viðureign þeirra við að halda köttum frá æðarvarpinu og síðar hvernig þau nýttu yrðlinga til að halda mávi í skefjum.

Ómar Smári Ármannsson göngugarpur sýndi myndir og lýsti hlöðnum refagildrum sem má sjá víða á Reykjanesskaga sjá - http://www.ferlir.is/?id=10912 ...

...
Meira

Leikritinu Eikin ættar minnar hefur verið mjög vel tekið. Á frumsýningu var húsfyllir og mikil gleði sem endaði með samkvæmi á eftir að hætti hússins.Tvær sýningar hafa verið síðan. Báðar vel sóttar. Í gærkvöldi þ.e. á þriðju sýningunni var öllum Grunnskólanemendum Grunnskóla Þingeyrar boðið af fiskvinnslufyrirtækinu Vísi hér á Þingeyri og var þetta talin besta sýningin af þeim sem sýndar hafa verið. Er fyrirtækinu sérstaklega þakkað fyrir þetta rausnarlega boð. Næsta sýning er ekki fyrr enn 27. þessa mánaðar og þar sem aðeins þrjár sýningar eru eftir, eru þeir sem sérstakan áhuga hafa á að sjá verkið hvattir til að tryggja sér miða í tíma, þar sem gert er ráð fyrir mikilli aðsókn nú um páskana tengt Skíðavikunni. Einnig viljum við minna á að eftir hverja sýningu er kaffihúsið SIMBAHÖLLIN opin og fleiri uppákomur eru í þessu sambandi sem vert er að taka eftir tengar Skíðavikunni.

Verkalýðsfélag Vestfirðinga skorar á samgönguráðherra að tryggja að ráðist verði í gerð jarðgangna milli Dýrafjarðar og Arnarfjarðar í beinu framhaldi á verklokum við Óshlíðargöng, sem og heilsárs vegbótum við alla þéttbýlisstaði á sunnanverðum Vestfjörðum. Þetta kemur fram í erindi sem Verkalýðsfélags Vestfirðinga sendi almennum borgarafundi sem haldin var á dögunum á Patreksfirði um heilsárs samgöngubætur milli norður- og suður Vestfjarða. Þar segir einnig: „Verkalýðsfélag Vestfirðinga leggur sérstaka áherslu á að tengja norður- og suðursvæði Vestfjarða í einni framkvæmd með jarðgöngum og vegabótum. Þá er ítrekað að útboð geti farið fram sem fyrst þannig að framkvæmdarinnar í heild sinni geti hafist eins fljótt og auðið er. Rétt er að benda á að svo til engir flutningar geta átt sér stað milli svæðanna nema yfir sumarmánuðina. Það kemur t.d. í veg fyrir að hægt sé að miðla afla til vinnslu milli staða á sunnanverðum Vestfjörðum annars vegar og staða á norðanverðum Vestfjörðum hins vegar. Slík aflamiðlun mundi án efa geta styrkt atvinnulíf í landshlutanum og auðveldað enn frekari samvinnu fyrirtækja, í sjávarútvegi og öðrum greinum......
Meira