Næstkomandi laugardag fer fram Söngkeppni framhaldsskólanna 2010 í Íþróttahöllinni á Akureyri. Meðal keppenda er Þingeyringurinn Hildur Sólmundsdóttir sem keppir fyrir Fjölbrautaskóla Norðurlands vestra. Hún vann undankeppnina þar með laginu Anytime eftir Kelly Clarkson en Hildur gerði sjálf íslenskan texta og heitir lagið Að eilífu, ávallt. Hildur er á 3. ári í FNV og hefur tekið virkan þátt í öllu félagslífi innan skólans, m.a. í tónlistarklúbbnum og í vetur er hún gjaldkeri
Nemendafélagsins. Lokakeppnin verður sýnd beint á Stöð 2 í opinni dagskrá laugardagskvöldið 10. apríl. Hægt er að gerast aðdáandi hennar á Facebook og þar er hægt að hlusta á upptöku af æfingu á laginu og sjá myndbönd með Hildi.

Góð mæting var í reiðhöllina á Söndum á föstudaginn langa. Hestamannafélagið Stormur var með opið hús undir yfirskriftinni Fjölskyldudagur Storms, þar var gestum boðið að fara á hestbak og einnig var boðið upp á kakó og kökur gegn vægu gjaldi. Veðrið var ekki eins og best verður á kosið, frekar kalt og gekk á með snjókomu, en gestir létu það ekki aftra sér að mæta og sumir voru komnir norðan frá Ísafirði og nágrenni til að leifa börnunum að fara á hestbak......
Meira

Hópur barna og unglinga frá hestamannafélögunum Stormi í Dýrafirði og Hendingu á Ísafirði komu saman á Söndum í Dýrafirði um helgina í fallegu veðri. Að því er fram kemur á vef Storms áttu ungu knaparnir saman skemmtilegan dag í reiðhöllinni og svo var farið í góðan útreiðartúr fram í Brekkudal í Dýrafirði. Í gömlu fjárréttinni var boðið upp á kakó og kökur, síðan var riðið heim að Söndum. Eftir útreiðartúrinn lá leiðin á Veitingarhornið á Þingeyri. Uppákoman var skipulögð af æskulýðsnefndum félaganna.

Spurningakeppnin Veistu hvað verður haldin í fjórða sinn á Veitingahorninu á skírdag. Keppnin hefst kl. 21:00 og spyrill verður Júlíus Arnarson. Það verður jafnframt hægt að panta pítsur milli 18 og 20 en Veitingahornið verður opið til miðnættis.
Hlökkum til að sjá sem flesta!

Ferðaþjónustubóndinn Guðmundur Helgi Helgason á Hótel Núpi í Dýrafirði fór til Seattle um miðjan mars og hélt þorrablót fyrir um 200 manns. Þetta er í fjórða sinn sem Guðmundur Helgi Helgason heldur þorrablót fyrir Íslendinga í Seattle og var það fjölmennasta blót í fjölda ára að því er fram kemur á vef ferðaþjónustu bænda. Með í för var eiginkona Guðmundar, Vordís Baldursdóttir. „Við eigum ættingja í Seattle og það vantaði kokk á þorrablót svo við ákváðum að slá til," segir Guðmundur í samtali við bb.is fyrir stuttu er hann var spurður hvernig það hafi komið til að dýrfirskt hótel sjái um þorrablót vestanhafs. Þess má geta að ýmislegt er á döfinni á Hótel Núpi í Dýrafirði á næstunni, m.a. í tengslum við „Aldrei fór ég suður" á Ísafirði um páskana og málþing um umhverfisvæna Vestfirði þann 17. apríl.

Fjórða sýning leikverksins Eikin ættar minnar fer fram á Þingeyri laugardagskvöld. Leikverkið tengist sögu Dýrafjarðar og fjallar um Ólaf Jónsson á Söndum í Dýrafirði sem var uppi á 16. öld. Þótti hann mjög merkur maður en Ólafur er eitt af fyrstu tónskáldum Íslandssögunnar og var meðal vinsælustu og virtustu skálda þjóðarinnar á sínum tíma. Höfundur og leikstjóri verksins er Elfar Logi Hannesson og tónlistarstjóri er Krista Sildoja sem einnig sér um tónlistarflutning. Síðustu tvær sýningarnar fara síðan fram um páskana. Í tilefni af því að sýningin renni brátt sitt skeið verður hópum, tíu manna eða fleiri, boðið upp á magnafslátt. Nánari upplýsingar um það eru í síma 848 4055......
Meira

...
Meira

Dýrafjarðardeild Rauða krossins fékk heimsókn á dögunum frá Heilsuleikskólanum Laufási. Komu börnin færandi hendi, en þau höfðu fengið pening fyrir flöskur sem þau höfðu safnað í hreinsunarátaki umhverfis leikskólann, og með stuðningi heiman frá. Einnig komu þau með notuð föt í fatasöfnunina. Óskuðu þau eftir að peningurinn rynni til barna á Haiti. Þau höfðu verið að vinna með "Hjálpfús" verkefnið frá Rauða krossinum þar sem fjallað er um börn með mismunandi aðbúnað og mismunandi bakgrunn.
Þakkar Deildin börnunum kærlega fyrir komuna.