Í fréttum ársins 2016 hér á Þingeyrarvefnum kennir ýmissa grasa.
Til gamans rifjum við upp örfáar þeirra svona frekar af léttara taginu. Fara þær hér á eftir. Þegar grannt er skoðað sést að fréttamagasínið okkar er ótrúlega fjölbreytt. Þetta geta menn sannreynt sjálfir.
Fréttamagasínið:
...
Áramótabrennur verða haldnar í öllum þéttbýliskjörnum Ísafjarðarbæjar 31. desember 2016 að því gefnu að veður verði til friðs sem allt bendir nú til.
Brennurnar verða á þessum stöðum á gamlárskvöld:
Árvellir í Hnífsdal kl 20.30
Hauganes á Ísafirði kl 20.30
Hlaðnes í Súgandafirði kl 20.30
Smábátahöfn á Flateyri kl 20.30
Þingeyraroddi á Þingeyri kl 20.20
Hinar kómísku tölu ársins eru 19 - 40 - 71. Bingó. Hvað á þetta eiginlega að fyrirstylla segja eflaust margir ef ekki allir og ekki skrítið en þó er kómísk merking bakvið hverja þessara talna. Þetta er 19 árið okkar, já við erum að verða tvítug bráðum, þá verður að vera allavega partý. 40 stendur fyrir að á árinu sem er alveg að verða búið frumsýndum við 40 verk okkar. Já, þau eru orðin 40 hin kómísku verk sem er líklega algjört met allavega hve varðar frumflutning. Því öll verkin nema eitt voru frumflutt af okkur, já við höfum á 19 árum skapað 19 ný íslensk leikverk. Gjörir okkur sennilega af duglegasta sjálfstæða leikhúsi landsins hvað þetta varðar. Loks er það talan 71 sem stendur fyrir þann fjölda sýninga sem við sýndum á árinu.
Það má segja að þetta sé bara gott bingó á einu ári. Okkar 19 ár er brátt á enda runnið og rétt að gera einsog siður er við áramót að gera upp árið.
...
7. Þing Alþýðusambands Vestfirðingafjórðungs var haldið í samkomuhúsinu á Flateyri í júní 1938. Tveim árum áður hafði verkalýðsfélagið Skjöldur á Flateyri staðið í harkalegri deilu við Alþýðusamband Íslands um rétt félagsmanna til forgangs að vinnu við karfavinnslu við Sólbakkaverksmiðjuna. Sátt komst á eftir milligöngu Ásgeirs Ásgeirssonar alþingismanns Vestur-Ísafjarðarsýslu, síðar forseta Íslands. Árið 1938 stóðu hinsvegar yfir deilur um skipulagsmál Alþýðusambandsins og Alþýðuflokksins, þar sem Vestfjarðasambandið stóð fast með einingu flokks og hreyfingar. Fulltrúar á þinginu á Flateyri 1938 voru myndaðir við sviðið í samkomuhúsinu.
Fremsta röð frá vinstri: Jónas Guðmundsson framkvæmdastjóri ASÍ, Stefán Jóhann Stefánsson forseti ASÍ og formaður Alþýðuflokksins, Guðmundur G. Hagalín rithöfundur og stjórnarmaður ASV, Hannibal Valdimarsson forseti ASV, Hjörtur Hjálmarsson skólastjóri Flateyri, forseti þingsins, Helgi Hannesson Ísafirði, Ragnar G. Guðjónsson gjaldkeri ASV.
Miðröð frá vinstri: Guðjón Bjarnason Bolungarvík, Davíð Davíðsson Patreksfirði, Sigurður J. Sigurðsson Hnífsdal, Sveinn Halldórsson Bolungarvík, Ágúst Vigfússon Bolungarvík, Gunnar Andrew Ísafirði, Guðmundur Bjarnason Ísafirði, Valdimar Sigtryggsson Ísafirði, Steinþór Benjamínsson Þingeyri, Bjarni G. Friðriksson Suðureyri, Sverrir Guðmundsson Ísafirði, Árni Magnússon Ísafirði.
Efsta röð frá vinstri: Ólafur Jónsson Súðavík, Halldór Ólafsson Ísafirði, Hermann Guðmundsson Suðureyri, Ingimundur Jónsson Þingeyri, Marías Þ. Guðmundsson Hnífsdal og Gunnar Bjarnason Ísafirði.
Fréttablað Verkalýðsfélags Vestfirðinga
7. árg. 2. tbl. desember 2016
...
Nútíminn er alls staðar, líka í formföstu messuhaldi. Í aðventustund í Dalskirkju að Kirkjubóli í Valþjófsdal, daginn fyrir Þorláksmessu, greip presturinn sr. Fjölnir Ásbjörnsson tækifærið og smellti einni sjálfsmynd af sér og kirkjugestum frá altarinu. Það er óhætt að segja að myndin hafi heppnast vel eins og sést hér að ofan.
„Það var skemmtilegt hvernig myndin kom út og fangaði stemninguna þarna, gleðina,“ segir sr. Fjölnir um myndina. Hann bar þó ekki símann innanklæða við altarið heldur var vinur hans, Björgvin Sveinsson, að mynda í kirkjunni, áður en athöfnin byrjaði, og notaði Fjölnir tækifærið, bað um að fá símann hjá honum og smellti einni af áður en hann byrjaði. „Þetta var bara svona augnabliks hugdetta, og í fyrsta skipti sem ég geri þetta,“ segir sr. Fjölnir. „Það tóku allir kirkjugestir vel í myndatökuna og var hún í stíl við gleðina sem ríkti í kirkjunni. Ég held að það sé lykilatriði að reyna að halda í léttleikann og vera glaður og gera eitthvað skemmtilegt.“
...
Vinir alþýðunnar á Eyrarbakka buðu til aðventustundar í hádeginu , mánudaginn 12. desember sl. í Alþýðuhúsinu á Eyrarbakka í Félagsheimilinu Stað.
Veislustjóri var Siggeir Ingólfsson, Staðarhaldari á Stað.
Á borðum voru afurðir Hjallastefnurnar sem Vinir alþýðunnar hafa verkað á þjóðlegan máta úr hráefni sem veitt hefur verið af Eyrarbakkabátnum Mána ÁR. Þetta var; kæst skata – nætursaltaður þorskur og siginn fiskur sem verkaður hefur verið í útsýnispallinum við Alþýðuhúsið á síðustu vikum. Þúsundir erlendra ferðamanna hafa myndað þar verkunina á fiskinum og þannig vottað þessa þjóðlegu verkunaraðferð Hjallastefnunnar.
...
