Í kvöld, 1. desember, verður bókakynning Vestfirska forlagsins á Cafe Catalína í Kópavogi. Kynningin hefst kl. 20:00 og eru allir hjartanlega velkomnir. Eftirtaldir höfundar munu lesa upp úr bókum sínum:

Jón Hjartarson - Veislan í norðri

Kristinn Snæland - Austur og vestur um haf

Grétar Snær Hjartarson - Frá Bjargtöngum að Djúpi

Guðrún Lára Ásgeirsdóttir - Öll þau klukknaköll

Matthías Kristinsson - Ísafjörður ægifagur

Harpa Jónsdóttir - Eitt andartak í einu

Þriðji flokkur kvenna hjá blakfélaginu Skell á Ísafirði leikur á fyrri hluta Íslandsmótsins í blaki sem haldið verður í Mosfellsbæ um helgina. Lið Skells spilar tvo leiki á laugardag, gegn HK frá Kópavogi og Dímon stúlkum frá Hvolsvelli. Þá spila stúlkurnar stíft á sunnudag en þá leika þær gegn Aftureldingu frá Mosfellsbæ, Höfrungi frá Þingeyri og liði Sindra frá Hornafirði.

 

Höfrungur frá Þingeyri sendir tvö lið á mótið og keppir bæði í stúlkna- og piltaflokki. Stúlkurnar mæta liði Sindra, Aftureldingar, Dímon stúlkna og HK á laugardag en eiga aðeins einn leik á sunnudag á móti Skell. Þá mæta piltarnir liði Aftureldingar, KA frá Akureyri og Þróttar frá Neskaupstað á laugardag.

 

Hægt verður að fylgjast með úrslitum leikjanna jafn óðum á vefsíðunni krakkablak.bli.is.

Leikritið Höfrungur á sviði var frumsýnt fyrir fullu húsi í Félagsheimilinu á Þingeyri á föstudagskvöld. „Leikritið fjallar um upphafssögu Höfrungs, hefst árið 1888 og nær fram til 1930. Strax á þessum tíma voru menn með fimleikaæfingar hérna og að reyna sig við einhverja slá við mjög fábrotnar aðstæður," segir Sigmundur Þórðarsonar, formaður íþróttafélagsins Höfrungs á Þingeyri í viðtali í Bæjarins besta í dag.

Þetta er í þriðja sinn á jafnmörgum árum sem leikdeild Höfrungs setur leikrit á sviði. „Á árum áður setti íþróttafélagið Höfrungur alltaf upp leikrit og við höfum verið að endurvekja þá starfsemi. Þetta er þriðja árið í röð sem Elfar Logi Hannesson semur fyrir okkur leikrit. Sú hugmynd að vinna með sögu félagsins er frá honum komin. Höfrungur var formlega stofnaður 20. desember árið 1904 og er sennilega þriðja elsta íþróttafélag landsins. Ungmennafélag Íslands var ekki stofnað fyrr en 1907. Þannig að saga Höfrungs er löng og merkileg og stofnendur þess birtast í leikritinu."......
Meira

Uppskeruhátíð Ferðamálasamtaka Vestfjarða fór fram í Dýrafirði þann 15. október síðastliðinn. Á heimasíðu samtakanna fer formaður þeirra, Sigurður Atlason, hlýjum orðum um Dýrfirðinga og þakkar kærlega fyrir þær móttökur sem hópurinn fékk þennan dag. Þar segir meðal annars: "Það var vel hugsað um hópinn hvar sem hann kom og einkar ánægjulegt fyrir okkur öll að kynnast því svona rækilega hvað Dýrafjörður hefur upp á mikið að bjóða og hversu vel er vandað til verka. Það er ekki síður uppörvun og hvatning til allra þeirra sem tóku þátt í ferðinni." Dagskrá hátíðarinnar var þétt og hópurinn kom víða við, en henni lauk með mikilli veislu á Hótel Núpi um kvöldið. Hér má lesa kveðjuna til Dýrfirðinga í heild sinni.

Leikritið „Höfrungur á sviði" var frumsýnt fyrir fullu húsi í Félagsheimilinu í gærkvöldi og er óhætt að segja að áhorfendur hafi verið ánægðir með sýninguna. „Þetta var mjög vel heppnuð leiksýning, kom skemmtilega á óvart", sagði Sigmundur Þórðarson, formaður íþróttafélagsins Höfrungs. Þetta er í þriðja sinn á jafnmörgum árum sem leikdeild Höfrungs setur leikrit á svið og í ár festi íþróttafélagið kaup á ljósaborði sem var eimmitt vígt í gær. „Það er komin toppaðstaða fyrir leiksýningar og aðra viðburði í Félagsheimilinu, sem er bara frábært. Það hafa allir tekið mjög vel í þetta verkefni og margir sem hafa styrkt sýninguna. Það er það sem gerir þetta mögulegt", sagði Sigmundur. Næsta sýning verður á morgun, sunnudaginn 6. nóvember, þriðja sýning fimmtudaginn 10. nóvember og fjórða sýning miðvikudaginn 16. nóvember. Allar sýningarnar hefjast kl: 20.00 og hægt er að panta miða í s. 848-4055.

Leikritið „Höfrungur á sviði" verður frumsýnt á Þingeyri í kvöld. Leikritið fjallar um upphaf íþróttaiðkunnar á Þingeyri sem hófst 1885 og íþróttafélagið Höfrung sem var stofnað 1904 og er með elstu starfandi íþróttafélaga á landinu í dag. Elfar Logi Hannesson leikstjóri segir leikritið bráðfjörugt og gamansamt og sannarlega vera fyrir alla fjölskylduna. Sýningin er viðamikil. Fjórtán leikarar og þar af eru þrír ættliðir sem stíga á stokk, fjölmargir á bak við tjöldin og í allt koma um 30 manns að sýningunni......
Meira

Frá og með næstkomandi sunnudegi mun íþróttafélagið Höfrungur bjóða upp á fjölskyldutíma í Íþróttahúsinu, milli kl. 10:00 og 12:00. Þá gefst foreldrum og forráðamönnum kostur á að mæta með börnin og hreyfa sig saman. Íþróttaiðkendum er frjálst að nota áhöld Íþróttamiðstöðvarinnar að vild, að tækjasalnum undanskildum, gegn því að hver gangi frá eftir sig. Vakin er athygli á því að ekki er ætlast til þess að börnin séu skilin eftir án ábyrgðarmanns (18 ára eða eldri), og eru þátttakendur minntir á að skrá sig í afgreiðslunni við komuna. Mætum öll og höfum gaman saman!

Sunnudaginn 30. október næstkomandi verður haldið námskeið í skartgripasmíði á vegum Fræðslumiðstöðvar Vestfjarða. Á námskeiðinu verða kenndar aðferðir við smíði á skartgripum, hvort sem er hringum, hálsfestum, eyrnalokkum, armböndum eða nælum. Þátttakendur koma til með að smíða einn skartgrip eftir eigin hönnun og gott væri að hver og einn kæmi með hugmyndir/teikningar að skartgrip með sér. Einnig verða kenndar ísetningar á steinum. Unnið verður með silfur og endurunnið silfur. Námskeiðið verður haldið í smíðastofu grunnskólans á Þingeyri. Kennari er Anna Dóra Ágústsdóttir smíðakennari. Nánari upplýsingar og skráning á vef Fræðslumiðstöðvar Vestfjarða www.frmst.is og í síma 456 5025.