Æfingar standa nú yfir á nýju íslensku leikriti um einbúann Gísla Oktavíus Gíslason betur þekktan sem Gísla á Uppsölum. Undirbúningur hefur staðið yfir í rúmt ár en nú hyllir undir frumsýningu.
Eins og Kómedíuleikhúsinu er háttur sem hefur verið leikhús á hjólum allt frá upphafi þá hafa æfingar einmitt verið bæði fyrir vestan og sunnan. Fyrir vestan hafa æfingar farið fram í hinum rómaða Gamla skóla á Bíldudal og einnig í París, krúttlegu húsi við sjóinn á Bíldudal.
Í Reykjavík hefur Þjóðleikhúsið verið svo elskulegt að hýsa okkur og þökkum við þeim sem og Bílddælingum fyrir skjólið.
Frumsýnt verður sunnudaginn 25. september 2016 kl.14 í Selárdalskirkju.
...
Stjórnmálamenn okkar blessaðir segja endalaust að við þurfum að bæta lífskjörin. Auðvitað er það þjóðarlygi. Fæstir þeirra segja sannleikann um að við þurfum að jafna lífskjörin og hætta að bruðla. Við höfum mikið, mikið meira en nóg af öllu þegar grannt er skoðað. Við þurfum bara að læra að forgangsraða. Það er heila málið og var orðtak alþýðukonunnar Þuríðar Jónsdóttur á Ósi í Arnarfirði.
Og nú hefur svolítið merkilegt skeð. Önnur kona, hinn nýi forsætisráðherra Bretlands, Theresa May, járnfrú númer tvö, hefur nýlega sagt að jafna verði kjörin í landi hennar. Það sé því eðlilegt að ráðast gegn ofurlaunum og risavöxnum kaupaukum. Stórmerkilegt!
...
Merkilegt má það kalla hvað okkur Íslendingum liggur mikið á. Það er allt undir brot og slit að breyta, helst öllu. Og sameina. Endilega að stækka og sameina og selja og kaupa. Auka lífsgæðin. Þekkt er slagorð okkar ágætu stjórnmálamanna hvar í flokki sem þeir standa: Við þurfum að bæta lífskjörin!
Það vita allir að þetta er þjóðarlygi.
Sannleikurinn er sá að við höfum ekkert með betri lífskjör að gera.
...
Í tilefni þess að nú eru 100 ár frá stofnun Alþýðuflokksins – flokks jafnaðarmanna á Íslandi, efnir Bókmenntafélag jafnaðarmanna til hátíðarfundar á Ísafirði laugardaginn 24. september 2016, klukkan 14 í Edinborgarsalnum á Ísafirði.
Dagskrá:
Árni Gunnarsson formaður Bókmenntafélags jafnaðarmanna ávarpar fundinn, fundarstjóri verður Ólína Kjerúlf Þorvarðardóttir.
1. Rauði bærinn Ísafjörður
Sigurður Pétursson sagnfræðingur flytur erindi um sögu og áhrif jafnaðarmanna á Ísafirði.
2. Afkomandi gamalla Ísafjarðarkrata lítur yfir farinn veg
Einar Kárason rithöfundur ræðir hann sögu og mikilvægi jafnaðarmannahreyfinga, bæði hérlendis og erlendis.
3. Pallborðsumræða: Á jafnaðarstefnan ennþá erindi?
Kolbrún Sverrisdóttir verkakona, Jón Baldvin Hannibalsson og Sighvatur Björgvinsson fyrrverandi formenn Alþýðuflokksins ræða stöðu og hlutverk jafnaðarstefnunnar ásamt framsögumönnum. Stjórnandi umræðunnar: Ólína Kjerúlf Þorvarðardóttir alþingismaður.
Hinn landskunni minkaveiðimaður, Reynir Bergsveinsson frá Gufudal, hefur verið á ferð hér vestra undanfarna daga. Er hann að leggja minkasíur sínar í æðarvörpum og víðar þar sem von er á vágestinum.
Til Álftamýrar, á norðurströnd Arnarfjarðar, lagði hann leið sína. Þegar hann kom út í svokallaða Ála, sem eru í túninu utan bæjarins, sá hann stokkandarhóp í sefinu. Tók hann eftir að ein öndin bagsaðist í hringi áður en hún gat flogið upp. Hagaði sér eins og eitthvað mikið væri að henni, særð eða eitthvað. Þótti Reyni þetta mjög undarlegt og virtist sem eitthvað héngi aftan í fuglinum. Skipti það ekki togum að hann tók haglabyssu sína og veitti fuglinum náðarskotið. Þurfti hann þrjú skot á 20-30 metra færi. Þegar hann gætti betur að kom í ljós að minkur hafði læst klónum í stélið á öndinni. Má segja að flugferð sú hafi endað nokkuð sviplega.
