Félagsmiðstöðvar Ísafjarðarbæjar ásamt félagsmiðstöðinni í Bolungarvík ætla að gera sér glaðan dag á Þingeyri næstkomandi föstudag. Dagskráin hefst klukkan 16:00 í Félagsheimilinu á Þingeyri, þar sem fram fer spurningakeppni í anda Gettu betur og Útsvars. Hver byggðarkjarni sendir frá sér eitt lið, en auk þess munu kennarar tefla fram einu liði. Öllum er frjálst að mæta á spurningakeppnina, en miðaverð á hana er 500kr. fyrir 16 ára og eldri og hvetjum við sem flesta til að mæta og skemmta sér með okkur.

Eftir keppnina hefst svo dagskrá sem er einungis ætluð unglingum í 8-10. bekk (7. bekkur í Grunnskólanum á Þingeyri fær að vera með) og lýkur kvöldinu með stærsta balli vetrarins þar sem að DJ Óli Geir & Haffi Haff munu trylla lýðinn fram eftir kvöldi...

...
Meira

Hjón með tvö börn á aldrinum 7 og 9 ára óska eftir íbúðaskiptum á Vestfjörðum við íbúð í vesturbæ Reykjavíkur, dagana 3.- 13 júní (má vera skemmri tími).  Frekari  upplýsingar fást hjá Andra í síma 8965711, andripp@gmail.com

Stuttmyndin Lýður var frumsýnd á Veitingahorninu á skírdag. Myndin er útskriftarverkefni Gests Vals Svanssonar og var meðal annars valin besta útskriftarmyndin úr Kvikmyndaskóla Íslands vorið 2010. Myndin fjallar um útrásarvíkinginn Lýð og hremmingarnar sem hann lendir í þegar hann ætlar að stinga af frá Íslandi. Með aðalhlutverk í myndinni fara Sveinn Þ. Geirsson, Steinn Ármann Magnússon, Gunnar Jónsson og Ingibjörg Reynisdóttir, en leikstjórn er í höndum Gests. Hátt í 100 manns horfðu á myndina á Veitingahorninu og létu vel af, en spurningakeppnin Veistu hvað fór einnig fram sama kvöld. Að þessu sinni voru spurningarnar í höndum Dýrfirðingsins Júlíusar Arnarsonar.

Víkingar á Þingeyri stóðu fyrir opnu húsi í Félagsheimilinu um páskana. Þar voru til sýnis ýmis víkingaverkfæri- og skartgripir, fatnaður, skór, hljóðfæri og vopn á borð við sverð og skildi. Þá voru einnig sett upp víkingatjöld, eldstæði og eldsmiðja. Góður rómur var gerður að sýningunni og hún var vel sótt. Borgný Gunnarsdóttir tók myndir sem má sjá hér en flestir munanna á sýningunni voru handverk Dýrfirðinga.

Fjögur Búnaðarfélög í Ísafjarðarbæ hafa verið sameinuð í eitt undir nafninu Búnaðarfélagið Bjarmi. Um er að ræða félög sem starfað hafa í Dýrafirði, Önundarfirði, Súgandafirði og Skutulsfirði, en félagsmenn þeirra ákváðu sameininguna á fundi sem haldinn var í friðarsetrinu í Holti þann 4. apríl. „Vonir okkar standa til þess að sameingin muni efla samfélagið og þjappa mönnum saman um sameiginlega hagsmuni," segir Guðmundur Steinar Björgmundsson, sem kjörinn var formaður fyrstu stjórn Búnaðarfélagsins Bjarmi. Aðrir stjórnarmenn eru Guðrún Íris Hreinsdóttir og Sighvatur Jón Þórarinsson....
Meira

Karlakórinn Ernir heldur sína árlegu vortónleika í Félagsheimilinu, fimmtudaginn 28. apríl kl. 20:00. Tónleikarnir á Þingeyri eru fyrstu tónleikar karlakórsins af þremur, en þeir verða í Félagsheimilinu í Bolungarvík næstkomandi föstudagskvöld kl. 20:00 og í Ísafjarðarkirkju sunnudaginn 1. maí kl. 17:00. Dagskráin er að vanda bæði fjölbreytt og skemmtileg, og eru Dýrfirðingar hvattir til að láta þetta tækifæri ekki fram hjá sér fara.

Íþróttafélagið Höfrungur stóð fyrir leikjadegi í Íþróttahúsinu um páskahelgina en Birna Baldursdóttir íþróttafræðingur hafði umsjón með ýmis konar hópleikjum fyrir þátttakendur, auk þess sem hún kynnti crossfit fyrir Dýrfirðingum. Fólk á öllum aldri mætti í Íþróttamiðstöðina til að gera sér glaðan dag og voru hátt í 200 manns samankomnir þegar mest var. Dagurinn þótti heppnast einstaklega vel og var ekki annað að sjá en að fólk hafi skemmt sér vel. Myndir frá leikjadeginum má sjá á heimasíðu Bergþórs Gunnlaugssonar.

Á aðalfundi íbúasamtakanna Átaks, sem haldinn var 5. apríl s.l. var kjörin ný stjórn samtakanna. Hana skipa:

 

Daðey Arnborg Sigþórsdóttir, formaður
Signý Þöll Kristinsdóttir, ritari
Jóhanna Gunnarsdóttir, gjaldkeri
Ólafur Skúlason, meðstjórnandi
Gunnar Gísli Sigurðsson, meðstjórnandi
Katrín Gunnarsdóttir, varamaður
Wouter Van Hoeymissen, varamaður.

 

Viljum við óska eftir að öll erindi sem taka á fyrir hjá samtökunum berist okkur skriflega og um leið nota tækifærið til að koma á framfæri tölvupóstfangi Átaks, ibuasamtokin.atak@gmail.com.

 

Þá viljum við þakka fyrri stjórn fyrir vel unnin störf.
Fyrir hönd íbúasamtakanna Átaks
Daðey