Eins og komið hefur fram í fréttum, eru mikil umsvif hjá hreppsnefnd Auðkúluhrepps í Arnarfirði þessar vikurnar. Nú sækjast til dæmis ýmsir auðmenn eftir að stofna alls konar fjárfestingafélög í hreppnum, sem eru þó nokkur þar fyrir eins og til dæmis Puntstrá ehf. Samvinnufélag. Þeir halda nefnilega margir að þar sé eitthvert skjól að finna fyrir sköttum með niðurfellingu opinberra gjalda líkt og á Tortola og Cayman Islands.  

Í því sambandi skulu nú rifjuð upp ýmis stór fjármál sem hafa verið til umfjöllunar hjá Kauphöll Auðkúluhrepps og Fjármálaeftirliti hreppsins, sem að vísu er lítt starfandi vegna fjárskorts. Allt á þetta að vera opið og gegnsætt. Liggur því beinast við að birta frétt frá í fyrrahaust sem sýnir vel við hvað hreppsnefndin er að kljást þarna í Auðkúluhreppi.

...
Meira

Það er ekki að því að spyrja þegar Dýrfirðingar koma saman að lyfta sér upp úr hversdagsleikanum með söng og hljóðfæraleik. Þá lifnar yfir mannlífinu. Hefur svo verið lengi. Rifja má upp að karlakór var stofnaður á Þingeyri 1906, einn sá fyrsti á landinu og hét Svanur. Lúðraflokkur stofnaður þar 1910, Big band þeirra tíma, var líka einn sá fyrsti á landinu og hét Lúðrasveit Dýrafjarðar. Svona mætti lengi telja.

Á nýliðnum Harmonikudegi, 4. maí, sem haldinn var hátíðlegur um land allt, komu Harmonikukarlarnir og Lóa með dragspil sín í Félagsheimilið og héldu ókeypis stórtónleika með ýmsum öðrum kröftum. Er þetta stærsta harmonikuhljómsveit norðan Alpafjalla eins og kunnugt er, eða þannig. Sannleikurinn er sá að harmonikukarlarnir í Dýrafirði, með Guðmund Ingvarsson hljómsveitarstjóra (og konsertmeistara) í broddi fylkingar, hafa nú all mörg lög á tónleikaskrá sinni sem þeir geta spilað kinnroðalaust hvar sem er og hvenær sem er, enda margar æfingar að baki.

...
Meira

Fyrir skemmstu var fjallað um óánægju bæjarstjóra Bolungarvíkurkaupstaðar með ímynd Bolungarvíkur á kortasíðu vefrisans Google. RUV.is sagði frá því að Jón Páll Hreinsson bæjarstjóri hefði gert athugasemd við hið eilífa vetrarríki sem ríkt hefur í Bolungarvík í netheimum og taldi hann það bæði óskírt og villandi fyrir væntanlega ferðamann. Skemmst er frá því að segja að með sameiginlegu átaki margra komust skilaboðin á réttan stað hjá fyrirtækinu og má nú sjá Víkina græna á vefkortum.

Allar ríkisstjórnir gera axarsköft, misstór. Það er bara mannlegt. Nú sjá ýmsir leikmenn og spekingar ekki annað en valdhafar hafi gert sig seka um algjört dómgreindarleysi í WOW air málinu. Og það þrátt fyrir að félagið hafi kannski verið vonlaust til frambúðar. Í þessu máli var svo margt að verja.   Peningafakírinn Mogensen heldur því fram að ríkissjóður hafi fengið hundruð milljarða í beinar og óbeinar tekjur af rekstri félagsins fram að gjaldþroti. Fyrir utan borg og bæi væntanlega. Þó það hefði ekki verið meira en bara eitt hundrað milljarðar, hefði það átt að kveikja viðvörunarljós hjá valdhöfum og ráðgjöfum  þeirra....
Meira

Þegar sólin lætur kræla á sér á vorin fer gróður að taka við sér og garðaeigendur fara á stjá og huga að tiltekt í görðunum sínum. Settir hafa verið gámar undir garðaúrgang á ýmsa staði í Ísafjarðarbæ. Gámurinn undir garðaúrgang fyrir Þingeyri hefur verið settur þar sem gámabíllinn stoppar, á malarplanið við höfnina. 

Við björgunarsveitarhúsið Stefánsbúð má einnig finna fatagám Rauða krossins en þar er tekið við fötum sem til stendur að henda. Rauði krossinn endurvinnur fötin og gefur bæði þurfandi hérlendis sem erlendis. Einnig eru endurnýttar flíkur seldar í Rauða krossbúðunum og svo eru fatapakkar seldir beint til útlanda en ágóðinn rennur í Hjálparsjóð Rauða krossins.  

Mikilvægt að notendur gámanna séu tillitssamir og passi að setja ekkert annað en garðaúrgang í garðagáminn og að fatapokar séu settir lokaðir í Rauða kross gáminn.

Dagur harmóníkunnar verður haldinn í Félagsheimilinu Þingeyri laugardaginn 4. maí 2019. Dagskráin stendur yfir frá kl. 15:00 til kl. 17:00. Kvenfélagið Von sér um veitingar og verða kaffi og vöfflur til sölu á vægu verði. 
Allir eru velkomnir og aðgangur ókeypis. 

Jæja. Nú er lóan komin í Arnarfjörð. Nánar tiltekið á fæðingarstað Jóns Sigurðssonar. Gömlu brýnin, sem héldu uppi merki staðarins í 40 ár, sáu eina lóu á svokölluðu Húsatúni fyrir neðan fjárhús staðarins um kl. 16 í gær, 26. apríl. Það var ánægjuleg sjón.

Þegar þau svo fóru til baka í Dýrafjörð, hvað haldið þið að þau sjái á Brekkuhálsinum? Þar var bara lóupar að spóka sig á miðjum veginum! Nú vantar ekkert nema Frú Kríu og kallinn hennar. Og kannski einhverja fleiri ljúfa vorboða.

Nýjustu fregnir herma að lóan sé löngu komin á Eyjuna hjá þeim Berta, Ástu og Brandi í Hólum í Dýrafirði.

Hún er vön að steypa sér þar niður beint úr langfluginu að utan hundruðum saman. Sumir segja jafnvel í þúsundavís.

Og hún er líka komin að Auðkúlu í Arnarfirði. Og örugglega víðar.

Frábærar fréttir!

Hér er samantekt af því helsta sem gerðist í viku 16 við vinnu Dýrafjarðarganga.

 

Miðvikudaginn 17. apríl sprengdi Sigurður Ingi Jóhannsson samgönguráðherra síðustu sprenginguna í Dýrafjarðargöngum að viðstöddu miklu fjölmenni. Greftri ganganna er því lokið og næsta sem tekur við er að taka niður lagnir og klára styrkingar í veggjum og á stöku stað í þekjunni. Vinna við lagnavinnu, sem verið hefur í gangi undanfarnar vikur, verður haldið áfram.

 

Í Dýrafirði var sem fyrr haldið áfram með vegagerð og haldið áfram með vegskálann og er nú búið að steypa 6 hluta af sökklum, samtals 72 m.