Jón Þórðarson, ferðamálafrömuður á Bíldudal, hefur lengi velt fyrir sér samgöngumálum í fjórðungnum og hvernig best megi tengja saman suður- og norðursvæði Vestfjarða. Hefur hann m.a. komið fram með aðrar hugmyndir en þær sem unnið er eftir í núgildandi samgönguáætlun. „Undanfarin ár og áratugi hefur samfélag mennta- og vísinda verið í uppbyggingu á Ísafjarðarsvæðinu og ef suðursvæðið á að lifa af er grundvallaratriði að við náum að tengja okkur samfélagi mennta- og vísinda. Það eru uppi raddir um að við á suðursvæðinu eigum frekar að beina sjónum okkar suðurávið, en ef leitað er í þá átt, þarf að fara alla leið á höfuðborgarsvæðið," segir Jón.

„Það hefur ekki tekist að byggja upp neitt slíkt samfélag á Snæfellsnesi þar sem þéttbýliskjarnanna næst okkur í suðurátt er að finna. Ísafjarðarsvæðið/norðursvæðið er líka háð því að geta stækkað sitt þjónustu- og markaðssvæði og það er ekki hægt nema með því að útvíkka það suður á firðina. Það er engin leið fær í austurátt." Jón leggur áherslu á að ef norður- og suðursvæði Vestfjarða eigi að virka sem ein heild verði fólk að geta ferðast á milli allt árið um kring, sinnt erindum og komist aftur heim á einum degi. Hann segir að þær hugmyndir sem unnið er með núna, og gera ráð fyrir jarðgöngum innarlega í Arnarfirði og Dýrafirði með tengingu við Patreksfjörð um Dynjandisheiði og Barðaströnd, geri vegalendina of langa. Íbúarnir muni ekki nota þessa samgöngutengingu eins og skyldi vegna þess að hún verði í öllum tilvikum of löng til að hægt sé að fara fram og til baka á einum degi.

 

Hann leggur til að í staðinn verði göngin gerð undir Hrafnseyrarheiði og ferjutenging verði yfir Arnarfjörðinn til Bíldudals sem er aðeins um 6,2 sjómílna leið. Með því að velja þá leið sparist umtalsverðar upphæðir við endurbætur á Dynjandisheiði og leiðin milli Patreksfjarðar, um Bíldudal og Þingeyri til Ísafjarðar verði bæði greiðfær og hæfilega löng. „Það þarf að vinna óhlutdræga úttekt á þessum möguleika og bera hann saman við hina leiðina sem nú er í undirbúningi. Mér sýnist ekki betur en svo, að auk þess að vera mun styttri og auðveldari í framkvæmd, muni þessi leið spara svo miklar fjárhæðir bæði við framkvæmdina, auk reksturs og viðhalds, að það yrði nóg eftir til að fara í Súðavíkurgöngin líka," segir Jón.