09.07.2016 - 08:03 | Vestfirska forlagið,bb.is
Víkingarnir koma til Dýrafjarðar í dag - 9. júlí 2016
Marsibil Kristjánsdóttur hugar að handverki sínu. Mynd: Gíslastaðir í Haukadal.
„Einsog mörgum er kunnugt þá var Gísli mikill smekkmaður og valdi sér land á Íslandi í Haukadal í Dýrafirði. Hann var og mikill handverksmaður, bóndi og smá víkingur. Í Dýrafirði er mikill áhugi á Gísla og söguöldinni á Íslandi, svo mikill að margir eiga orðið búninga og hafa tileinkað sér fornt handverk að hætti Auðar Vésteinsdóttur, Gísla Súra og annarra sögualdarmanna og kvenna,“ segir Marsibil. Lítil smiðja verður sett upp fyrir utan Gíslastaði þar sem járnsmiðir verða að störfum. Öllum er velkomið að koma og fylgjast með hinu frækna handverksfólki að störfum. Húsið opnar kl. 14 og síðasta sporið verður tekið klukkan 17.
Margt fleira verður um að vera á Gíslastöðum þennan dag. Meðal annars verður sagt frá nýju verkefni um Gísla sögu Súrssonar en tveir vestfirskir listamenn vinna nú að því að gera teiknimyndasögu um kappann og mun hún verða frumsýnd í prentútgáfu BB í haust. Einnig verður sýnt brot úr verðlaunasýningu Kómedíuleikhússins um kappann. „Nú falla öll vötn til Dýrafjarðar og um að gera að gera sér ferð á Gíslastaði á laugardag. Það kostar ekkert inn en vel mögulegt að fjárfesta í handverki víkinganna frá Dýrafirði,“ segir Marsibil að lokum.
