Mynd sem sýnir fyrirhugað vegstæði. Mynd: visir.is.

Vegamálastjóri vonast til að hin umdeilda vegagerð um Teigsskóg í Þorskafirði verði boðin út fyrir áramót og að endurskoðun umhverfismats ljúki í sumar. Þetta kom fram í viðtali í fréttum Stöðvar 2 í gærkvöldi. Í frétt á Vísi segir að deilurnar um hvort Vestfjarðavegur um Gufudalsveit verði lagður um Teigsskóg virðist vera sagan endalausa og rifjað upp þegar vegamálaráðherra síðustu ríkisstjórnar, Ögmundur Jónasson, sagði nei, hafi Vestfirðingar strunsað út af mótmælafundi á Patreksfirði.

Eitt fyrsta verk eftirmanns hans, Hönnu Birnu Kristjánsdóttur, var setja vegagerð um Teigskóg aftur í ferli en hún lenti fljótlega í hindrunum sem hún kallaði stjórnsýsluflækju. Núna, þremur árum síðar, sér vegamálastjóri fram á að greiðast sé úr flækjunni, það hylli undir nýtt umhverfismat eftir að Skipulagsstofnun heimilaði endurupptöku þess í fyrra. Búið er að senda fyrstu drög að nýrri skýrslu til Skipulagsstofnunar til skoðunar og vonast Hreinn Haraldsson að framkvæmdir megi hefjast á næsta ári.

Veglína hefur verið færð svo að minna raski verði á Teigskógi. Gangi þessi áform eftir mega Vestfirðingar eiga von á að losna við tvo erfiða fjallvegi, um Ódrjúgsháls og Hjallaháls eftir þrjú til fjögur ár, eða um svipað leiti og Dýrafjarðargöng opna.