Hildigunnarbraut liggur rétt utan við gangamunna Dýrafjarðarganga á Rauðsstöðum. Ljósm.: H. S.

Hér fyrir vestan eru menn óðum að átta sig á því að varðveita þarf örnefnin, bæði gömul og ný, skrásetja þau og koma þeim á rétta staði samkv. örnefnakortum.
Mikið af örnefnum eru þegar skrásett og hafa verið jafnvel um aldir. Svo eru hin sem orðið hafa til á síðari tímum. Mörg þeirra eru enn ekki skrásett sem slík. Svo er það kannski álitamál hvað eru örnefni og hvað ekki.

Skulu nú nefnd nokkur nýleg dæmi um það úr Auðkúluhreppi.

Hildigunnarbraut:

Hún er rétt við gangamunna væntanlegra Dýrafjarðarganga og er svokallaður vetrarvegur. Hildigunnarbraut var lögð til að losna við Rauðsstaðadokkuna eða dældina á þjóðveginum utan Rauðsstaða, sem oft fyllist af margra metra þykkum snjó á vetrin. Það var húsfreyjan á Auðkúlu, Hildigunnur Guðmundsdóttir, sem beitti sér fyrir lagningu brautarinnar og heitir auðvitað í höfuðið á henni. Var þetta á þeim árum er skólahald var í Mjólkárvirkjun.