Þrettánda Flæðareyrarhátíðin fór fram í byrjun júlí 2016.
Um 250 manns komu saman á Flæðareyri og skemmtu sér vel þrátt fyrir að veðrið hafi oft verið betra.

Hátíðin er haldin fjórða hvert ár og mikið í hana lagt hverju sinni. Dansað var þrjú kvöld í röð og sáu hljómsveitirnar Dynjandi og Sútarabandið hið yngra um tónlistina. Farið var í göngur að Dynjanda og Höfða, efnt til kvikmyndasýningar og að sjálfsögðu haldin kvöldvaka.

Fyrsta hátíðin var haldin 1969, en Grunnavíkurhreppur fór í eyði þann 8. nóvember 1962. Af þessu má sjá að Grunnvíkingar og afkomendur þeirra hafi strax efnt til félagsskapar til þess að rækta tengslin við heimahagana. Ungmennafélagið Glaður í Grunnavíkurhreppi fékk árið 1933 að gjöf lóð undir samkomuhúsið sem það reisti og enn stendur. Húsinu er haldið við af miklum dugnaði.

Guðbjartur Guðbjartsson tók myndirnar.