Þistilfiðrildi sást á Sandafelli á laugardaginn. Það var Borgný Gunnarsdóttir sem kom auga á fiðrildið og tók meðfylgjandi mynd. Á heimasíðu Náttúrufræðistofnunar kemur fram að þistilfiðrildi hafi margsinnis náð til Íslands og sum þeirra komið svo snemma að þau hafa náð að verpa og geta af sér nýja kynslóð, en veturinn lifi þau ekki af. Þetta árið sáust fiðrildin fyrst í Garðabæ 18.maí og síðan þá hefur sést til þeirra við Reykjanesvirkjun, í Sandgerði og Reykjavík - og nú á Þingeyri.

 

Náttúrufræðistofnun ætlar að fylgjast grannt með komu fiðrildanna og biðja alla þá sem verða þeirra varir að tilkynna um þau til Erlings Ólafssonar skordýrafræðings á erling@ni.is