05.02.2016 - 20:30 | Hallgrímur Sveinsson
Þingeyri við Dýrafjörð: Óveður á veðursælum stað!
Á Þingeyri við Dýrafjörð 5. febrúar 2016. Ljósm.: HS
Eins og margir vita, er Þingeyri við Dýrafjörð einhver veðursælasti staður á Íslandi og þó víðar væri leitað. En nú bregður svo við að þar á bæ hefur ekki verið hundi út sigandi frá því í gærkveldi. Mjög óvanalegt. Dregið hefur í mikla skafla víða. Hiti á núllinu. Sumir eru búnir að moka tvisvar frá útidyrunum í dag og dugir varla til. Götur kauptúnsins mega heita ófærar nema stærstu fjallabílum og slíkum tryllitækjum. Fáir á ferli nema þeir sem nauðsynlega mega til.
Meðfylgjandi myndir voru teknar í dag um hálf fimm þegar aðeins rofaði til. Þær segja meira en mörg orð. Ljósm. H. S.
