Þrettán sinnum hefur flugi verið beint á Þingeyrarflugvöll á þessu ári þegar ófært hefur verið til lendingar á Ísafirði að sögn Arnórs Jónatanssonar, svæðisstjóra Flugfélags Íslands á Ísafirði. „Það er mikið í umræðunni að fólk haldi að við viljum ekki fljúga á Þingeyrarflugvöll og viljum frekar sleppa flugi en svo er ekki. Um leið og við sleppum flugi töpum við farþegum, þannig að við reynum allt sem við getum til þess að flytja farþega með flugi vestur," segir Arnór. Hann segir legu Þingeyrarflugvallar valda því að ekki sé hægt að fljúga oftar þangað þegar ófært er á Ísafjarðarflugvöll. „Þingeyrarflugvöllur er ekki að virka sem varaflugvöllur þegar ófært er á Ísafjörð," segir Arnór.

 

Aðspurður hvort Þingeyrarflugvöllur hafi átt að vera varaflugvöllur fyrir Ísafjörð segir Arnór svo ekki vera. „Ég held að fólk haldi að hann hafi átt að gera það. Alltof sjaldan er hægt að fljúga á Þingeyri þegar ófært er á Ísafjörð," segir Arnór. „Hann er góður í suðaustanátt þegar ófært er á Ísafjörð. En í suðvestan- og vestanáttum er hann óhentugur eins og hefur verið síðastliðna daga," segir Guðbjörn Charlesson, umdæmisstjóri Flugmálastjórnar á Vestfjörðum. „Mér finnst hann ekki vera nýttur nógu vel af Flugfélaginu, það er það eina sem ég get sagt," segir Guðbjörn aðspurður hvort nýta megi völlinn betur.

 

Þingeyrarflugvöllur var vígður af Sturlu Böðvarssyni, þáverandi samgönguráðherra, í ágúst 2006 eftir miklar endurbætur. Heildarkostnaður við framkvæmdina var 182 milljónir króna en Vegagerðin ákvað að greiða 12 milljóna króna kostnað við flutning þjóðvegarins við völlinn. Kostnaður Flugmálastjórnar var 170 milljónir króna. Þar af fóru 105 milljónir króna til verktakans sem sá um framkvæmdina, en annar kostnaður eins og ljósa- og veðurathugunarbúnaður var 35 milljónir króna. Hönnun, eftirlit og námur kostuðu 42 milljónir króna.