Sunnlendingur vikunnar er Dýrfirðingur
Fastur þáttur í Sunnlenska fréttablaðinu á Selfossi í viku hverri er Sunnlendingur vikunnar.
.
Í síðustu viku var það Dýrfirðingurinn Þór Líni Sævarsson, sjómaður og afreksmaður í akstri.
.
Svör Þórs Lína við venjubundnum spurningum blaðsins fara hér á eftir:
Landsbyggðin vanmetin
Nafn: Þór Líni Sævarsson.
Fæddur hvar og hvenær: Á Þingeyri 19. ágúst 1988 kl. 06:30.
Foreldrar: Elskuleg móðir mín er Þingeyringur og heitir Kristbjörg Bjarnadóttir. Nú ástkær faðir minn er einnig Þingeyringur og heitir Sævar og er Gunnarsson.
Systkini: Ég á þrjú systkini og eru þau öll mér jafn kær Róbert Aron, Dagbjört og Perla
Hjúskaparstaða: Ég á ekki konu.
Börn: Ekki enn tekist að búa til barn.
Heimili: Melhólar 11 (Þórsheimilið) þar sem við Klemenz Karl búum.
Menntun: Ég hef séð um það að mestu leyti sjálfur.
Atvinna: Síkátur sjóari á dragnótarbát frá Þingeyri.
Áhugamál: Það eru flest þau tæki sem eru með vél og komast hratt áfram.
Hvar ertu í pólitík: Vinstri sinnaður, alveg klárt mál.
Hvað finnst þér að megi betur fara í landinu: Fólk má vera jákvæðara.
Hvað gerðirðu við peninginn sem frúin í Hamborg gaf þér: Keypti mér rallýbíl.
Uppáhaldsmatur: Það mun vera lambalæri að hætti ömmu Sullu.
Uppáhaldsdrykkur: Tunglskyn mun hann heita.
Uppáhaldsbók: Síðasta bók sem ég las heitir Davíð og fiskarnir og mér fannst hún fín.
Uppáhaldstónlistarmaður: Þeir eru eiginlega tveir: Kóngurinn hann Bubbi og Vilhjálmur Vilhjálmsson.
Uppáhaldsbíómynd: Titanic.
Eitt atriði sem fólk veit almennt ekki um þig: Ég fylgist ekki með fótbolta.
Ertu hjátrúarfullur: Nei, myndi ekki segja það.
Mesta afrek í lífinu: Bara að hafa fæðst.
Neyðarlegasta atvik: Þegar ég var stoppaður af gamalli konu fyrir að fleygja rusli út úr bifreið minni og hún stóð yfir mér á meðan ég týndi það upp.
Hvaða persónu úr mannkynssögunni værir þú helst til í að drekka kaffi með: Birgittu Haukdal.
Trúirðu á líf eftir dauðann: Já, já, já.
Lýstu þér í fimm orðum: Heiðarlegur, feiminn, stór, flottur og sterkur.
Hvað er ofmetið: Reykjavík.
En vanmetið: Landsbyggðin.
Hvert myndirðu ferðast með tímavél: Í Þorskastríðið.
Ef þú mættir vera einhver annar í einn dag: Hemmi Gunn. Hann brosir allan daginn svo það getur ekki annað en verið gaman.
Bestu kaup sem þú hefur gert: Rallýbíll.
En verstu: Þvottavél, því þá kemur þvotturinn ekki samanbrotinn heim og uppí skáp frá mömmu gömlu.
Lífsmottó: Gera það sem mann langar til.
Selfyssingurinn Þór Líni Sævarsson var fyrir stuttu valinn nýliði ársins í rallinu á Íslandi á lokahófi aksturíþróttamanna.
