Samgönguráðherra hefur ákveðið að skipa starfshóp til að hefja undirbúning við nýjan veg um Dynjandisheiði. Hópurinn á að hefja störf með haustinu. Kristján L. Möller samgönguráðherra sagði við athöfn í tilefni af 50 ára afmæli vegarins á dögunum að hann hefði ákveðið að skipa starfshóp til að hefja undirbúning við verkið. Verkefni hópsins verður að fara yfir athuganir og hugmyndir sem þegar liggja fyrir og standa jafnframt fyrir nauðsynlegum viðbótar rannsóknum og úttektum til að unnt verði að leggja fram tillögur um gerð og legu vegarins. Yrði þar gert ráð fyrir varanlegu og heilsárs vegarsambandi.
Verkinu skal hagað þannig að Vegagerðin geti lokið hönnun, mati á umhverfisáhrifum og öðrum nauðsynlegum undirbúningi nógu tímanlega til að unnt verði að hefja framkvæmdir í beinu framhaldi af gerð jarðganga milli Dýrafjarðar og Arnarfjarðar.

Vegagerðinni er falið að stýra verkefninu og tilnefna þrjá fulltrúa í hópinn og farið hefur verið fram á að Fjórðungssamband Vestfirðinga skipi tvo fulltrúa í starfshópinn. Stjórn Fjórðungssambands Vestfirðinga hefur samþykkt að tilnefna þau Eyrúnu I Sigþórsdóttur, Tálknafirði og Sigurð Pétursson, Ísafirði. Sigurður er bæjarfulltrúi í Ísafjarðarbæ, hann situr í stjórn FV og er jafnframt formaður samgöngunefndar FV. Eyrún er oddviti Tálknafjarðarhrepps og situr í samgöngunefnd FV.

Stjórn Fjórðungssambands Vestfirðinga áréttar um leið þá stefnu vestfirskra sveitarfélaga að samhliða framkvæmdum við gerð jarðganga milli Dýrafjarðar og Arnarfjarðar (Dýrafjarðargöng), verði hafist handa við gerð jarðganga undir Dynjandisheiði. Stjórn FV telur sig hinsvegar ekki geta sett sig andstöðu, við að hraðað sé vinnu við hönnun og mat á áhrifum framkvæmdar á vegi um Dynjandisheiði í samhengi við gerð Dýrafjarðargangna. Ekki sé fyrirfram gefið hver verði niðurstaða þeirrar vinnu og mikilvægt að tryggja aðkomu sveitarfélaga á Vestfjörðum í þessu máli.