Hin árlega heimildarmyndahátíð á Patreksfirði, Skjaldborgarhátíðin, var haldin um nýliðna helgi og var það í 12. sinn sem hún er haldin. Átján íslenskar heimildarmyndir voru frumsýndar á hátíðinni en það var heimildamyndin Söngur Kanemu eftir Önnu Þóru Steinþórsdóttur sem var hlutskörpust og hlaut hún bæði Ljóskastarann, aðalverðlaun dómnefndar, og áhorfendaverðlaunin Einarinn. Í umsögn dómnefndar kom fram að myndin hafi ríkt erindi við samtíma sinn, miðli mikilvægum lífsgildum og fangi litróf þjóðarinnar. Sagan sé sögð af mikilli hlýju og næmi, full af gleði og hjarta. 
Hvatningarverðlaun hátíðarinnar hlaut heimildarmyndinn Rjómi eftir Freyju Kristinsdóttur. Dómnefndina skipaði Ragnar Bragason, Elísabet Indra Ragnarsdóttir og Yrsa Roca Fannberg. 

Áætlað er að um 250 manns hafi sótt hátíðina að þessu sinni og þó mikið hafi rignt og blásið á þátttakendur hátíðarinnar létu þeir veðrið lítið á sig fá og yljuðu sér á plokkfisk sem kvennfélagið Sif reiddi fram, fóru í bíó, á ball og skemmtu sér vel.