Söngkonan og lagahöfundurinn Agnes Sólmundardóttir frá Þingeyri kallar ekki allt ömmu sína þegar kemur að tónlist en hún á eitt lag í úrslitum Sönglagakeppni Vestfjarða sem haldin verður á föstudagskvöld. Ekki nóg með það að Agnes, sem er nýorðin 13 ára, hafi komist í úrslit með lag sitt, því hún á einnig texta við lagið ásamt því að hún mun stíga á svið og flytja það sjálf. Fjórtán lög keppa til úrslita á föstudag en valnefnd valdi úr ríflega fimmtíu innsendum lögum.

 

Umgjörðin utan um keppnina er öll hin glæsilegasta en áhorfendur munu velja uppáhaldslag sitt í kosningu og mun það hljóta áhorfendaverðlaun. Dómnefnd velur svo sigurlagið í lok kvöldsins en meðal þess sem verður á boðstólnum er veitingar frá strákunum á Við pollinn og stórhljómsveit keppninnar, undir stjórn Hrólfs Vagnssonar mun leika fyrir dansi að keppni lokinni. Miðar á keppnina verða aðeins seldir í forsölu, en hún er hafin hjá Magnúsi Hávarðarsyni í síma 456-7055 eða 849-2006.