Sléttanesið ÍS 808 á leið til Rússlands (Hrafn GK111)
Frystitogarinn Hrafn GK 111, sem undanfarna mánuði hefur legið við bryggjuí Grindavík og beðið örlaga sinna hefur fengið nýja eigendur og nýtt nafn í Rússlandi.
Togarinn lauk störfum sínum fyrir Þorbjörn eftir að togarinn Hrafn Sveinbjarnarson kom úr stækkun frá Póllandi og í kjölfarið voru gerðar umtalsverðar breytingar á togaraútgerð Þorbjarnar.
Nýir eigendur hafa tekið við skipinu eftir reynslusiglingu á dögunum og mun Hrafn sigla áleiðis til Vladivostok á morgun -21. maí 2015-
Hrafn GK hefur fengið nafnið F/T NERA. Siglingin er um 12.000 sjómílur og mun væntanlega taka um 50 daga. Leiðin liggur suður fyrir og um Gíbraltarsund inn í Miðjarðarhafið. Farið verður um Suez skurðinn og framhjá sjóræningjaslóðum í Adenflóa.
Eins og flestir Dýrfirðingar vita var skip þetta upphaflega Sléttanes ÍS 808 og smíðað í Slippstöðinni á Akureyri árið 1983 fyrir Fáfni hf. á Þingeyri sem var útgerðarfélag Kaupfélags Dýrfirðinga. Skipið var lengt árið 1993 og breytt í frystiskip.
Björn Ingi Bjarnason.
