26.07.2016 - 12:12 | Vestfirska forlagið,bb.is
Síðasti leggur plæginga hafinn í Dýrafirði
Jarðýta Gámaþjónustu Vestfjarða að plægja í Dýrafirði. Mynd: Teitur Magnússon/OV
Búið er að leggja streng frá Felli í Dýrafirði að Núpi, frá Núpi að Gerðhömrum og nú er jarðýtan komin inn fyrir bæinn Mýrar i norðanverðum Dýrafirði, og þá er hafinn síðasti leggur plæginga að sögn Teits Magnússonar línumanns hjá OV.
„Strengurinn sem verið er að plægja núna tengist þegar komið verður að Gemlufalli við streng sem fyrir er ofan til við bæinn. Verkið hefur gengið vel fyrir sig og verður jarðýtan vonandi komin að Gemlufalli öðru hvoru megin við verslunarmannahelgi en þá er eftir töluverður frágangur við tengingar á heimtaugum og háspennustreng til að hægt sé að taka loftlínu úr rekstri og má ætla að þeim frágangi verði lokið með haustinu,“ segir Teitur. Þegar verkinu lýkur verður komið þriggja fasa rafmagn og aukið afhendingaröryggi.
