Selja lykt í krukku
Hótelstjórar Hótel Núps í Dýrafirði fara nýjar leiðir að nýta og selja afurðir úr heimahéraði. Nýjasta varan þeirra er lykt frá ýmsum stöðum í firðinum fagra sem fólk getur keypt í krukkum. „Við erum nú þegar búnir að fara í fjósið á Gemlufalli og fylla krukkur af lykt. Eins fórum við í eyðibýlin á Arnarnesi og á Ingjaldssandsheiði," segir Sigurður. Krukkurnar eru nýfarnar í sölu og þó svo að enginn hafi fjárfest í þeim enn vekur hugmyndin mikla lukku. „Flestum sem hafa séð þetta finnst þetta vera fáránleg en mjög fyndin hugmynd. Það hafa bara verið heimamenn á Núpi frá því að þetta var boðið til sölu, sem eru ekki helsti markhópurinn okkar, það eru líklegast frekar útlendingar sem vilja taka með sér lykt frá Íslandi," segir Sigurður Arnfjörð Helgason.
„Hann segir þá ábyrgjast vöruna. Um leið og maður opnar dósina á maður að geta fundið lyktina. Við ábyrgjumst þetta, þannig að ef engin lykt er í krukkunni þegar hún er opnuð sendum við nýja eða endurgreiðum hana."
Þá eru einnig seldar hefðbundnari vörur eins og bláberja- og rabarbarasulta, en hráefni þeirra eru einnig fengin í Dýrafirði. Líka er selt túnfíflahunang sem var mjög vinsælt í fyrra. „Strax og túnfíflarnir byrja að blómstra útbý ég hunang úr þeim. Svo ætla ég að búa til hundasúrupestó og hundasúrumajónes. Að auki verða til sölu þurrkaðar kryddjurtir frá Skrúð en þær nota ég alltaf til að krydda lamabakjötið okkar með," segir Guðmundur. Hann segir góða reynslu vera komna á þessa vöru. „Með vöfflunum í kaffinu á Núpi er boðið upp á rabarbara- og bláberjasultu og túnfíflahunang. Það er mjög algengt að fólk kaupi sér þetta eftir að það hefur smakkað afurðirnar með kaffinu. Við seldum mikið af þessu í fyrra og langvinsælast var túnfíflahunangið," segir Guðmundur.
Stefnan er að vera með sem flestar vörur úr þessari línu í sölutjaldi Veislu að vestan á Hrafnseyri 17. júní en einnig ætla þeir bræður að vera með vöruna til sölu á Dýrafjarðardögum í sumar.
