Ekki er annað að sjá en dömurnar séu lukkulegar í eldhúsinu hjá Eiríki hótelhaldara. Enda er aðstaða öll þar til fyrir myndar. Frá vinstri: Ágústa Pálína Guðjónsdóttir, Pálína Færseth og Natalía Snorradóttir. Ljósm. H. S.

Inngangurinn að Hótel Sandafelli. Ljósm . H. S.

Bergþóra Haukdal Hákonardóttir hótelstjóri. Ljósm. H. S.

Þessir ungu menn kunnu vel að meta rúgbrauðið með reyktu bleikjunni, auk annars meðlætis. Frá vinstri: Þór Líni, sjómaður dáðadrengur, Kristján forseti og Bjarni Georg útgerðarstjóri. Ljósm. H. S.

Ágúst Einarsson og co frá Nesi. Svo er einn hlaupandi fyrir utan. Það er greinilega allt á ferð og flugi! Ljósm. H. S.

« 1 af 5 »

Hótel Sandafell í sókn -

Hann brá sér til Reykjavíkur í vor hann Eiríkur hótelhaldari á Hótel Sandafelli á Þingeyri. Sótti þangað tvær flottar konur til að sjá um reksturinn. Þetta eru þær Bergþóra Haukdal Hákonardóttir, sem er hótelstjóri og Pálína Færseth, sem er aðstoðarhótelstjóri. Bergþóra er ættuð úr Haukadal. Meira að segja frænka hennar Ólafíu okkar. Pálína er aftur á móti frá Siglufirði. Það er gott til þess að vita að atgervisflóttinn er ekki bara á annan veginn. Yfirleitt er það okkar fólk sem flytur burt og gerir garðinn frægan í höfuðborginni og víðar. Kemur svo varla til baka nema sem gestir.

   Það er ánægjulegt að koma á Hótel Sandafell. Gott viðmót. Þar er þrifnaður og húsakynni öll til fyrirmyndar eins og alltaf hefur verið. Þar er öll hótelþjónusta og hefur aðsókn verið mjög góð eins og víðar þessa dagana. Og heimabakaða rúgbrauðið hennar Pálínu er „spezialitet“ staðarins eins og sagt er. Slær sko aldeilis í gegn. Það er borið fram með reyktum silungi. Og þykir sælgæti. 

Hallgrímur Sveinsson.