Höfuðstöðvar Orkubús Vestfjarða á Ísafirði.

Nú um áramótin hækkaði verð á dreifingu raforku frá Orkubúi Vestfjarða um 4% í þéttbýli og 10% í dreifbýli. Þessar umtalsverðu hækkanir á verðskrá eru réttlættar með því að verð á dreifingu raforku hafi ekki hækkað á undangengnum tveim árum. 4% hækkun í þéttbýli er rökstudd með vísan til þess að verðlagshækkun síðustu tvö ár hefur verið um 6% og að dreifigjaldskrár OV hafa alla tíð verið undir leyfilegum tekjumörkum og eru uppsafnaðar tekjuheimildir OV í lok árs 2013 um 472 milljónir króna vanteknar í þéttbýli. 10% hækkun í dreifbýli er auk þess rökstudd með því að dreifigjaldskrár OV hafi alla tíð verið vel undir leyfilegum tekjumörkum og eru uppsafnaðar tekjuheimildir OV í lok árs 2013 um 410 milljónir króna vanteknar í dreifbýli. Þá er einnig bent á að OV hefur og mun á næstu árum leggja út í mikinn kostnað vegna endurnýjunar dreifikerfa í sveitum þar sem þriggja fasa strengur er lagður í stað einfasa loftlínu.

Á heimasíðu Orkubúsins segir: „Orkustofnun er eftirlitsaðili með verðlagningu dreifiveitna og setur þeim árlega tekjumörk. (Árleg tekjumörk eru þær tekjur sem dreifiveita þarf árlega til að standa undir rekstri sínum að mati Orkustofnunar). Orkustofnun hefur farið yfir og staðfest neðanskráðar hækkanir á verðskrám OV fyrir dreifingu raforku."