Opnun tilboða fagnað með lófaklappi
Opnun tilboða í Dýrafjarðargöng var fagnað með lófaklappi í akademíunni hjá henni Tobbu í sundlauginni á Þingeyri í morgun. Suðurverk hf og Metrostav s. s. frá Tékklandi áttu lægsta tilboðið, 8,7 milljarða króna. Er það rúm 93% af kostnaðaráætlun. Næstu tilboð voru um 630 milljónum kr. hærri, eða svipuð og kostnaðaráætlunin sem hljóðaði upp á 9.319,890,000,- kr.
Dýrafjarðargöng verða 5,6 km löng
Dýrafjarðargöng verða 5,6 km löng, eða svipuð og Bolungarvíkurgöng. Þau munu liggja á milli Drangahlíðar í innanaverðum Dýrafirði og hlíðarinnar utan Rauðsstaða í Borgarfirði í Arnarfirði. Vegur beggja megin vegganganna frá Mjólkárvirkjun að Dýrafjarðarbrú verður 8,1 km að lengd, alls 13,7 km af nýjum vegi. Er það allt innifalið í tilboðunum.
Fyrstu veggöng á Íslandi
Og er nú rétt að rifja upp að fyrstu veggöng á Íslandi liggja í gegnum Arnarneshamar milli Ísafjarðar og Súðavíkur. Voru þau sprengd 1948/1949 og eru um 30 metra löng. Yzt á Súðavíkurhlíð, úti undir Arnarnesi, var lengi verbúðahverfi nokkurt. Stunduðu menn sjó þar allan ársins hring, nema yfir hásumarið. Þar hétu Hafnir og heitir svo enn.
