Íbúum Önundarfjarðar hefur borist liðsauki frá nágrönnum í Dýrafirði í baráttunni fyrir því að aldraðir fái að eyða ævikvöldinu í sinni heimabyggð. Svo sem fram hefur komið fóru fulltrúar Önfirðinga á fund með heilbrigðisráðherra Álfheiði Ingadóttur 14. janúar til að koma á framfæri undirskriftum Önfirðinga til að mótmæla fyrirhugaðri lokun Sólborgar af hálfu Heilbrigðisstofnunar Vestfjarða. Að sögn formanns Íbúasamtaka Önundarfjarðar áttu fulltrúar Önfirðinga góðan fund með ráðherra og hennar starfsmönnum þar sem málefni og úrræði er varða möguleika eldriborgara til dvalar í sinni heimabyggð voru rædd. Önfirðingum hefur nú borist liðsauki frá yfir 90 íbúum á Þingeyri sem einnig hafa safnað undirskriftum vegna Sólborgar, undir svohljóðandi texta.

„Við undirritaðir íbúar á Þingeyri mótmælum þeirri ákvörðun heilbrigðisyfirvalda að ætla að loka Öldrunarheimilinu Sólborg á Flateyri. Með þessu viljum við sýna samstöðu með nágrönnum okkar. Því þetta skiptir okkur öll máli. Það er stór hópur fólks hér á svæðinu sem fyrr en varir þarf á þessari þjónustu að halda svo við þurfum frekar að byggja upp en rífa niður."

Í tilkynningu frá Íbúasamtökum Önundarfjarðar er Þingeyringum og Dýrfirðingum þakkað af heilum hug fyrir þennan stuðning.

 

Vilja samtökin „undirstrika sérstaklega það sem fram kemur með undirskrift þeirra, að staðreyndin er sú að við eldumst og stór hópur fólks er að nálgast það að þurfa úrræði til vistunar á ævikvöldi. Við íbúar í Ísafjarðarbæ verðum að geta boðið öldruðum sómasamleg úrræði þegar þar kemur, með samvinnu heilbrigðisyfirvalda og bæjarfélagsins. Gera verður kröfu um það að eldriborgarar geti dvalið nærri sinni heimabyggð, en þurfi ekki að hrökklast burt úr bæjarfélaginu til annarra landshluta."