Ólína gefur kost á sér til forystu fyrir Samfylkinguna
„Ég er jafnaðarmaður að hugsjón, set fólk í fyrirrúm og brenn fyrir jöfnuð, réttlæti og sanngjarnar leikreglur í samfélagi okkar. Mín helstu baráttumál hafa verið breytingar á fiskveiðistjórnunarkerfinu, bættar samgöngurog velferðarmál. Ég vil að Ísland sé eitt samfélag fyrir alla þar sem hver maður fær að gefa eftir getu og þiggja eftir þörfum. þar sem treysta má á gott og gjaldfrjálst heilbrigðiskerfi, sterkt menntakerfi og traust og skilvirt almannatryggingakerfi. Ég vil að byrðum sé dreift á herðar þeirra sem geta borið þær. Í velferðarsamfélagi á enginn maður að þurfa að óttast afkomu sína vegna örorku, aldurs eða fötlunar. Eg vil samfélag þar sem þjóðarauðlindir eru nýttar í þágu samfélagsins og öflugra atvinnugreina; þar sem heilbrigt samkeppnisumhverfi ríkir í öllum atvinnugreinum og mannréttindi og atvinnufrelsi eru ófrávíkjanleg krafa. Markaðurinn á að vera þjónn en ekki herra" segir Ólína.
Ólína var kjörin á þing árið 2009 fyrir Samfylkinguna í Norðvesturkjördæmi og sat þar til ársins 2013. Hún tók aftur þingsæti síðasta haust við fráfall Guðbjartar Hannessonar, fyrrverandi velferðarráðherra. Hún segist í framboðstilkynningu þekkja þau mál sem brenna á byggðum landsins af eigin raun. Vill hún beita sér fyrir bættum lífskjörum og afkomu íbúa landsbyggðarinnar.
,,Nú er brýnna en nokkru sinni að snúa við þeirri óheillaþróun sem orðið hefur í tíð núverandi ríkisstjórnar. Velferðarkerfið er í miklum vanda og engin menntastefna sjáanleg" segir Ólína. Hún segir að hægt og bítandi sé verið að ýta fólki inn í einkarekin heilbrigðis- og menntakerfi með því að fjársvelta svo hið opinbera kerfi að það rís ekki undir hlutverki sínu. ,,Mikið verk er óunnið í samgöngumálum, byggðamálum, auðlinda- og atvinnumálum, málefnum skuldara, öryrkja, aldraðra og barnafólks.
Fólkið fyrst! Krafan er um eitt samfélag fyrir alla."
