Bjarni á Fönix, nýtt íslenskt leikverk verður frumsýnt í hlöðunni að Alviðru í Dýrafirði kl. 21 á föstudagskvöld. Um er að ræða einleik úr smiðju Kómedíuleikhússins á Ísafirði. Höfundar verksins eru þeir Elfar Logi Hannesson og Ársæll Níelsson sem jafnframt er leikari í sýningunni. Leikmynd og búninga gerði Marsibil G. Kristjánsdóttir. Bjarni á Fönix er fyrsta frumsýning Kómedíuleikhússins á þessu leikári.

„Skipherrann Bjarni Þorlaugarson á skútunni Fönix háði frækinn bardaga við hátt í 30 Fransmenn um miðja nítjándu öld. Bardaginn stóð yfir í heila fjóra klukkutíma, að vísu tóku menn sér stutta pásu í miðjum átökum, og gekk Bjarni óskaddaður af vettvangi. Skömmu síðar fannst sjórekið lík af einum Fransmanni og voru uppi kenningar um að Bjarni hafi orðið hans bani. Mál var dómtekið og þurfti Bjarni þá að spyrja sig þeirrar samviskuspurningar: Drap ég mann eða drap ég ekki mann? Sagan af Bjarna skipherra á Fönix er sönn vestfirsk hetju- og þroskasaga. Í þessu leikverki skipstast á ástir og átök úr íslenskum raunveruleika. Bjarni á Fönix er kraftmikil sýning sem lætur engan ósnortinn," segir í kynningu á leikverkinu.

Önnur sýning á Bjarna á Fönix verður á veitingastaðnum Talisman á Suðureyri laugardaginn 21. september.