Rúmar 19 milljónir fóru í viðburði og framkvæmdir skrúðgarðsins Skrúðs í Dýrafirði á síðasta ári. Þar má helst nefna veglega hátíðardagskrá í Skrúði í ágúst þar sem haldið var upp á 100 ára vígsluafmæli garðsins en sá sögulegi viðburður varð þann 7. ágúst árið 1909. Kostnaður við afmælið var tæp milljón. Einnig hefur verið unnið að miklum endurbótum og nýframkvæmdum við og í umhverfi garðsins. Kostnaðarmesti liðurinn voru lagning bílastæðis og vegar en því næst kom hönnun, eftirlit, teikningar og ráðgjöf sem hljóðaði upp á tæpar fjórar milljónir. Stofnkostnaður við uppsetningu rafmagns í garðinum var 1,5 milljón. Kostnaðurinn kom í hlut framkvæmdasjóðs Skrúðs en fyrir liggur að töluverður kostnaður fari í framkvæmdir á þessu ári, m.a. frágangur og fyrirhuguð malbikun á bílastæði og stíg auk þess sem ráðgert er að koma upp nýjum hvalbeinum í garðinum. Þá eru uppi áform um að koma upp nýbyggingu aðstöðuhúss við garðinn.

 

Skrúður í Dýrafirði er einn elsti skrúðgarður Íslands. Sérstaða Skrúðs umfram aðra garða er ekki síst tengd tilurð og tilgangi hans en í upphafi var hann hugsaður sem kennslugarður fyrir nemendur á Núpi. Stofnandi Skrúðs, séra Sigtryggur Guðlaugsson, tíundaði mikilvægi ræktunar garðjurta til fæðubótar og heilbrigðis. Segja má að sú hugsun hafi á þeim tíma verið langt á undan samtímanum. Í garðinum voru kjálkabein af einni stærstu steypireyði sem hefur verið fönguð við Ísland, en það var árið árið 1892. Þau voru tekin niður á síðasta ári og komið til varanlegrar varðveislu og verða yngri bein sett upp í staðinn.