Umsvif silungaeldis Dýrfisks í Dýrafirði hefur aukist mikið frá því að það hófst fyrir tveimur árum. „Við erum með 300.000 stykki á Haukadalsbótinni í Dýrafirði núna en byrjuðum með 50.000. Svo stendur til að bæta við 500.000 seiðum í vetur," segir Brynjar Gunnarsson, umsjónarmaður eldisins. Hann segir að fyrirhugað sé að slátra í kringum jólin. „Við slátruðum síðastliðið haust og var fiskurinn þá 2-3 kg. Nú er fyrirhugað að láta hann vaxa í 3+ kg." Brynjar segir Dýrfiskmenn vera bjartsýna á framhaldið.

Dýrfiskur rekur einnig fiskeldisstöð á Tálknafirði. Regnbogasilungsseiði eru framleidd hjá þremur fyrirtækjum; Laxalóni, Norðurlaxi og Dýrfiski í Tálknafirði.