Sigurlaugur Baldursson og Margrét Rakel Hauksdóttir frá Núpi í Dýrafirði.

Björgunarfélag Ísafjarðar afhenti á dögunum þeim hjónum Margréti Rakel Hauksdóttur frá Núpi í Dýrafirði og Sigurlaugi Baldurssyni þakkarskjöld og risaneyðarkall fyrir stuðning og aðstoð sem þau hafa veitt Björgunarfélaginu.

Margrét og Sigurlaugur reka kranaþjónustuna Laugi ehf og Bílaverkstæði SB ehf og hafa verið ósínk á tæki, tól og tíma þegar Björgunarfélagið þarf á að halda og segir Teitur Magnússon björgunarfélagsmaður að félagið reyni eftir fremsta megni að þakka fyrir það sem þeim er gefið, hvort sem um er að ræða vinnuframlag eða peningagjafir.

„Þau hafa í fjölda ára, lagt okkur til kranabíla og körfubíla hvort sem við þurfum á því að halda í fjáröflunum eða útköllum. Svo reka þau Bílaverkstæði sem við þurfum oft á að halda og þau eru boðin og búin að lána okkur aðstöðu til viðgerðar.Við létum útbúa þennan skjöld í tengslum við byggingu æfingaturnsins en án þeirra aðstoðar værum við sennilega enn á byrjunarreit byggingarinnar.“ bætir Teitur við.