Í dag er kómískur dagur. Því í dag kynnum við leikárið okkar sem er sannarlega ævintýralegt og sögulegt.

Tvö ný íslensk leikrit verða frumsýnd auk þess verða tveir góðir kómedíukunningar áfram á fjölunum. Allir ættu að geta fundið sér eitthvað við hæfi á leikárinu því úrval sýninganna er sannarlega eitthvað fyrir alla.

Fyrsta frumsýning leikársins er í október þegar ævintýraleikurinn Búkolla - Ævintýraheimur Muggs.

Hér er á ferðinni ævintýraleg sýning fyrir börn á öllum aldri. Hér eru gömlu góðu þjóðsögurnar og ævintýrin í aðalhlutverki. Þessir þjóðlegu gullmolar sem vestfirski listamaðurinn Muggur myndskreytti svo vel að enn eru landmönnum að góðu kunn. Gullmolarnir sem við sögu koma eru Búkolla, Sálin hans Jóns míns og perlan Dimmalimm. Sýningin er ferðasýning og verður á fjölunum um land allt.

Seinni frumsýning leikársins er einnig sótt í vestfirskan sagnaarf, Sigvaldi Kaldalóns. Doktorinn og tónskáldið átti litríka ævi. Hann tók við læknisembætti í einu afskekktasta læknishéraði landsins fyrir vestan og víst var lífið þar ekki einsog í einföldum söngleik. Þrátt fyrir það samdi Sigvaldi margar af sínum helstu sönglagaperlum á Kaldalónsárunum. Það er Elfar Logi Hannesson sem mun bregða sér í hlutverk Sigvalda en með honum á sviðinu verður tónlistarkonan Dagný Arnalds sem mun sjá um músík þátt sýningarinnar.

Loks eru tveir sígildir Kómedíukunningjar á fjölunum á leikárinu. Fyrst ber að nefna fornkappann Gísla Súrsson. Sú sýning hefur verið á fjölunum síðan 2005 og hefur slegið í gegn svo ekki sé meira sagt. Sýningin hefur verið á ferðinni um land allt og einnig nokkrum sinnum á erlendri grund þar sem sýningin hefur unnið til verðlauna. Gísli Súrsson er fáanlegur bæði á íslensku og ensku og er sýndur um land allt árið um kring.

Loks verður jólasýningin Bjálfansbarnið og bræður hans sýnd fyrir jólin. Að þessu sinni verður farið í leikferð með sýninguna bæði norður á land og einnig verður kikkað við í höfuðborginni.

Nánari upplýsingar um allar sýningar leikársins eru á  www.komedia.is.  Munið sýningar okkar eru allar ferðasýningar og eru því fáanlegar um land allt.

Kómedíuleikárið 2012 - 2013 er hafið hlökkum til að sjá ykkur í leikhúsinu um land allt.

Góða Skemmtun.