Jarðgöng milli Arnarfjarðar og Dýrafjarðar verða boðin út á næsta ári ef allt gengur eftir. Samkvæmt tillögu að matsáætlun, sem Náttúrustofa Vestfjarða vann fyrir Vegagerðina, þarf verkið í umhverfismat vegna þess að nýlögn vegar ásamt lengd ganga er meiri en 10 km. Núverandi vegur milli norður og suðursvæðis Vestfjarða þykir óviðunandi bæði vegtæknilega og með tilliti til umferðaröryggis segir í matsáætluninni. Hafa þessar erfiðu samgöngur eða samgönguleysi aftrað mjög samskiptum milli íbúa Barðastrandasýslna og Ísafjarðarsýslna. Vegurinn er aðeins fær yfir sumarið, Hrafnseyrarheiðin þykir stórhættuleg vegna snjóflóðahættu og Dynjandisheiðin er oft leiðinleg yfirferðar.

Aðeins ein leið kemur til greina fyrir jarðgöng milli Dýrafjarðar og Arnarfjarðar. Gerður verður vegur frá Brúnni inn í botn. Í Arnarfirði koma göngin út við eyðibýlið Rauðsstaði í Borgarfirði, ekki langt frá Mjólkárvirkjun.

 

Ekki liggur fyrir hvenær byrjað verður að grafa göngin en gert er ráð fyrir að verkið verði boðið út á næsta ári. Áætlaður framkvæmdatími er um þrjú ár en gangagerðinni á að vera lokið árið 2012. Frá þessu var sagt á vef Svæðisútvarps Vestfjarða.