Íslendingum mun fjölga um þriðjung næstu hálfu öldina samkvæmt nýrri mannfjöldaspá sem Hagstofa Íslands hefur birt.

Miðspá stofnunarinnar gerir ráð fyrir að Íslendingar verði orðnir 442 þúsund alls árið 2065, en þeir voru 332 þúsund í byrjun þessa árs.

Háspá Hagstofunnar segir að íbúarnir verði orðnir 523 þúsund í lok spátímabilsins.

Lágspáin gerir ráð fyrir að þeir verði 369 þúsund, og fjölgi þar með einungis um 37 þúsund á tímabilinu.

• Hlutfall 65 ára og eldri fer yfir 20% af heildarmannfjölda árið 2035 og yfir 25% árið 2061.

• Frá árinu 2049 verða þeir sem eru 65 ára eða eldri í fyrsta sinni fjölmennari en þeir sem eru yngri en tvítugir.