A A A
  • 1935 - Soffía Einarsdóttir
27.07.2009 - 09:51 | bb.is

Íslendingar óðir í Dýrafjörðinn

Það sækja margir í sæluna í Dýrafirði.
Það sækja margir í sæluna í Dýrafirði.
Íslenskir ferðamenn hafa fjölmennt að Núpi í Dýrafirði það sem af er sumri en fjöldi fólks hefur lagt leið sína á sumarhótelið þar. „Þetta hefur gengið rosalega vel, eins og í lygasögu", segir Sigurður Arnfjörð, hótelstjóri Hótel Núps. „Það hefur verið helmings aukning frá því í fyrra. Það er ótrúlegt út af fyrir sig en sumarið í fyrra fór fram úr öllu björtustu vonum." Sigurður segir það aðallega vera Íslendinga sem fjölmenna í Dýrafjörðinn sem útskýrir aukninguna en greinilegt er að innlend ferðamennska hefur aukist gríðarlega í sumar og þá sérstaklega til Vestfjarða.

 

„Þetta er líka öðruvísi en í fyrra hvað varðar fyrirvara hjá fólki. Í fyrra var mikið um pantanir langt fram í tímann, nú er þetta mikið lausatraffík eða fólk sem er að panta með mjög stuttum fyrirvara. Þetta er jafnvel fólk sem er komið á Þingeyri eða er í næsta firði. Fólk virðist því lítið vera að plana fram í tímann, það bara skellir sér vestur", segir Sigurður.

Það er einnig búið að vera mikið um mannfögnuði að Núpi en þar hafa verið skipulögð ættarmót frá síðustu helgi júní fram í byrjun ágúst. Þá er að vænta 100 íslenskunema sem gista að Núpi á vegum Háskólaseturs Vestfjarða og verður hótelið þá troðfullt í þrjár vikur. „Það er 150 manna ættarmót hérna um verslunarmannahelgina. Fólkið fer á sunnudeginum og 100 íslenskunemar koma hérna á mánudegi, það verður því nóg að gera", segir Sigurður. „Við vorum með 60 til 70 manna hóp af íslenskunemum hérna hjá okkur á sama tíma í fyrra og það var mjög gaman að hafa þá. Þetta var mjög skemmtilegur hópur og góður hvað umgengni varðar, okkur hlakkar því mikið til."

 

Núpur hefur þó ekki alveg sloppið við íslensku kreppuna en heldur færri hafa sótt í hin vikulegu kökuhlaðborð sem haldin hafa verið á hverjum sunnudegi síðustu tvö sumur. Sigurður segir að svo virðist vera sem fólk sé að skera niður hvað þetta varðar en hann viðurkennir fúslega að heldur færri hafa sóst í hlaðborðin í sumar samanborið við sumarið í fyrra.

Sigurður segir að hótelið verður opið með hefðbundnu sniði fram á 1. september. Hinsvegar hefur verið mikið um bókanir um helgar í september og því sé jafnvel búist við því að hann haldi opnu þar allar helgar september. „Í desember förum við svo af stað með jólahlaðborðin eins og í fyrra. Á þeim verður auðvitað allt hráefni fengið úr héraði eins og stefna hótelsins gerir ráð fyrir. Þar verður veislustjórinn engin undantekning, það verður enginn annar en Hemmi Gunn úr Haukadal."

« Mars »
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31