Röð íbúafunda í Ísafjarðarbæ hefst klukkan 20 í kvöld með fundi í félagsheimilinu á Þingeyri. Eiríkur Finnur Greipsson, formaður bæjarráðs Ísafjarðarbæjar, og fulltrúi frá íbúasamtökunum Átaki verða með framsögu á fundinum, en að þeim loknum sitja bæjarfulltrúar og embættismenn fyrir svörum.

Fundarefni: Kynning á hverfisráðum og íbúalýðræði, horfur og staða í rekstri bæjarins og skoðanaskipti um verkefni í hverjum byggðarkjarna og framtíð samfélagsins í heild sinni. Sambærilegur fundur verður haldinn í Félagsbæ á Flateyri klukkan 20 annað kvöld, þar sem Daníel Jakobsson bæjarstjóri og fulltrúi frá Íbúasamtökum Önundarfjarðar verða með framsögu.