Myndatexti: Sigurður Þ. Gunnarsson, fyrrum hreppstjóri í Þingeyrarhreppi. Hreppstjórahúfan var í það minnsta. Það gerði nú ekkert til. Hann þurfti sjaldan að setja hana upp, enda fólk í hans hreppi mjög löghlýðið. Fyrirrennari hans, Gunnar Jóhannesson, þurfti þess ekki heldur. Ljósm.: H. S.

Hér er hreppstjórinn húfulaus í kartöflugarðinum á Hrafnseyri. Þar fékk hann að setja niður nokkur vor hjá Guðrúnu vinkonu sinni, húsfreyju og bónda á þeim bæ. Þessar rauðu sem kallinn er svo montinn af, eru flottar. Nokkur stykki af þeim komu upphaflega í umslagi frá frænda þeirra Hvammsbræðra í Suður-Ameríku. Pínulitlar. Þeir gáfu þær Guðbrandi heitnum vini okkar í Hólum. Frá honum rötuðu svo nokkur stykki til hreppstjórans. Ljósm.: H. S.

Hallgrímur Sveinsson og Sigurður Þ. Gunnarsson. Ljósm.: BIB

« 1 af 3 »

Hrós vikunnar fær Sigurður Þ. Gunnarsson, hreppstjóri frá Miðbæ í Haukadal, fyrir að trúa á mátt moldarinnar.

Sigurður setur niður kartöflur á hverju vori. Er með seigari mönnum í kartöfluræktinni hér vestra. Þetta mættu fleiri gera sem vettlingi geta valdið. Alls staðar hægt að fá garðland. Kartaflan  er stórkostleg jurt að maður tali nú ekki um gulrófur, gulrætur og allt kálið. Hreppstjórinn okkar ræktar heilmikið af þessum dásamlegu jurtum líka.

Var einhver að tala um jarðarber? Þau leynast nú ótrúlega víða. Svo er bara að þeyta rjómann og setja nokkra rommdropa útí. Þeir eru farnir að fást aftur. Berist fram kalt!

Hallgrímur Sveinsson

Björn Ingi Bjarnason