Tveir vinir. Hemmi Gunn var víst aldrei í hreppsnefnd Auðkúluhrepps. Aftur á móti var hann safnvörður á Hrafnseyri og var staðarprýði. Stóri-Grímur sat aftur á móti lengi í nefndinni og situr víst enn þó merkilegt sé. Ljósm. Svandís Bára Karlsdóttir, þáverandi bæjarfrú á Hrafnseyri.

Hreppsnefnd Auðkúluhrepps kom undan feldinum til fundar í vikunni eð var. Sumir hreppsnefndarmenn í þeirri góðu nefnd eru langt að komnir sem kunnugt er. En þeir láta það nú ekki stoppa sig fremur en hinir. Ýmislegt var á dagskrá og kannski ekki allt eftir Morthensbók. Lítilsháttar af því má nefna til gagns og gamans fyrir húmorista og þá sem lengra eru komnir!

Að fara á grasafjall í staðinn fyrir berjamó

Það liggur nú á borðinu að lítil sem engin ber verða á miðhlua Vestfjarða að þessu sinni. Sumir segja þó að eitthvað verði af krækiberjum á völdum stöðum sem eru leyndarmál á þessu stigi. Hreppsnefndin var búin að gefa það út í fjölmiðlum að hún myndi ræða þessa alvarlegu stöðu í Auðkúluhreppi. Á áðurnefndum fundi kom svo fram, að svakalegt væri ef menn geta hvorki verið sjálfbjarga með berjasultu né saft í vetur. Bláber væru holl, mjög holl. Undraefnin í þeim bæti minni og viðbrögð, hægi á Alzheimer/elliglöpum með ýmsum leiðum og styrki taugakerfið. Svona mætti lengi telja. En um það þýðir víst ekki að tala segir í ályktun þeirrar frægu nefndar.

Nú nú. Nefndin samþykkti í einu hljóði að beina þeim eindregnu tilmælum til fólks að skella sér bara á grasafjall í staðinn fyrir berjamóinn. Þetta gerði Grasa-Gudda á sínum tíma. Fyrstu heimildir um fjallagrös á Íslandi má finna í Jónsbók sem er lögbók frá árinu 1281. Þar kemur fram að ólöglegt var að tína grös á landi annarra bænda. Það þarf sem sagt leyfi. Jarðir sem höfðu góð grasalönd voru metnar mikils virði og grasatekja jók á verðgildi jarðanna. Fjallagrös eru til margs brúkleg, svo sem lækninga gegn ýmsum kvillum í öndunarvegi t.d. kvefi, lungnakvefi, asma og berklum og kvillum í meltingafærum t.d. magabólgum, meltingatruflunum, hægðartregðu og til þess að bæta matarlyst.

Persónuverndarfulltrúi ráðinn í Auðkúluhrepp

Gengið var frá ráðningu persónuverndarfulltrúa á fundinum. Laun hans verða 750,000,- kr. á mánuði. Óunnin yfirvinna er 250,000,- kr. á mánuði og dagpeningar og ferðakosnaður reiknast 300,000,- kr. Símakostnaður ótakmarkaður. Engin starfslýsing, verklagsreglur né erindisbréf fylgja þessu starfi til að byrja með, en eru væntanlegar seinna að sögn oddvitans.

Hörð gagnrýni kom fram á að staðan skyldi ekki hafa verið auglýst. Vildu sumir hreppsnefndarmenn halda því fram að sá sem ráðinn var sé einn af vildarvinum og sundfélögum oddvitans. Var því ekki mótmælt.

Fleira margt var rætt á fundinum þó ekki verði nánar skýrt frá því að sinni. Þess má geta að veðurfarsályktun nefndarinnar frá um daginn hitti ákkúrat í mark.

                      Hallgrímur Sveinsson