Bankastjóri Einkabanka Auðkúluhrepps staddur í Washington, höfuðborg USA, korteri fyrir hrun 2008. Hann og Einstein eru greinilega málkunnugir! Ljósm Þ. E.

Urgur í hreppsnefndarmönnum

Hreppsnefnd Auðkúluhrepps er nú farin í snemmtekið sumarfrí. En það verður ekki langt því margt er á borði nefndarinnar. Eru það ýmis alvarleg og erfið mál. Bann liggur við því að hreppsnefndarmenn fari til útlanda núna. Oddvitinn segir að þeir geti bara verið heima hjá sér. Verið tiltækir ef á þarf að halda. Og notað símann eða Skype eða eitthvað eins og sænska stelpan Greta Thunberg.

Það er urgur í mannskapnum. Af hverju mega menn ekki skreppa aðeins til útlanda? Alveg eins og þeir þarna fyrir sunnan hjá Umhvefisstofnun eða hvað það nú heitir. Það er sko stórkostlegt lið. Og umhverfisráðherrann æmtir hvorki né skræmtir! Fjárveitingavaldið auðvitað úti að aka þegar þeir eru ekki erlendis.

Gárungarnir í hreppnum eru nú að glettast með það að hreppsnefndin ætli að lýsa yfir neyðarástandi í sveitarfélaginu á næsta fundi. Það er nú ekki víst að þeim verði kápan úr því klæðinu. En sumir eru uggandi! Þeir hafa nú löngum þótt svolítið spes þarna í Auðkúluhreppi sem kunnugt er!

Af erfiðum málum nefndarinnar má til dæmis nefna innbrotið í K. D. útibú á Auðkúlu í haust. Það er að vísu ekki beint á borði nefndarinnar, heldur er það Rannsóknarlögregla Auðkúluhrepps sem er með málið í rannsókn. En hún er mannfá sem kunnugt er. Svo eru nefndin víst að undirbúa formlega stofnun skattaskjóls í hreppnum. Peningarnir hrúgast nefnilega inn í Einkabanka Auðkúluhrepps, símnefni Peningaþvætti.