Björn Davíðsson og græna havaii skyrtan hans stálu óvænt senunni í kosningasjónvarpinu í gær er Björn las kosningatölur frá Ísafirði íklæddur skyrtunni í sjónvarpi allra landsmanna. Björn á veglegt safn skrautlegra skyrta en í samtali við fréttamann RÚV sagði hann skyrtuna vera í hógværari kantinum af fjölmörgum slíkum í hans eigu. „Þessi er ein af hófsamari skyrtunum – maður vill ekki stuða landsmenn of mikið. Hún var valin með hliðsjón af því að ég væri að fara í sjónvarpið“ sagði Björn en hann er fæddur og uppalinn á Þingeyri en búsettur á Ísafirði. 

Mikið hefur verið rætt um klæðnað Björns víða á ýmsum samfélagsmiðlum en umfang umræðunnar bendir til að kosningarnar í gær hafi verið heldur lágstemmdar. Úrslit kosninga á Ísafirði voru fjórir kjörnir fulltrúar Í-listans sem misstu einn fulltrúa, þrír fulltrúar Sjálfstæðisflokksins og tveir kjörnir fulltrúar Framsóknarflokksins sem við það bættu við sig einum fulltrúa. Eftir úrslit kosninganna er því ljóst að meirihlutinn er fallinn og óljóst enn sem komið er hvert framhaldið verður.