Íbúasamtökin Átak í Dýrafirði telja skynsamlegast að tekið verði upp merki V-Ísafjarðarsýslu sem skjaldarmerki Ísafjarðarbæjar. „Sú leið er ekki einungis langsamlega hagstæðust fjárhagslega séð, heldur er einnig um að ræða merki sem áður hefur staðið sem tákn fyrir flesta byggðakjarna sameinaðs sveitarfélags Ísafjarðarbæjar," segir í bréfi sem samtökin hafa sent bæjaryfirvöldum. Bæjarráð fjallaði um bréfið á síðasta fundi og þakkaði umsögnina.

„Því miður hafa önnur íbúasamtök ekki lokið breytingum á samþykktum sínum í samræmi við bæjarmálasamþykkt Ísafjarðarbæjar og því ekki fengið málið til umsagnar," segir í fundarbókun. Bæjarráð óskar eftir því að íbúasamtökum sveitarfélagsins verði sent samskonar bréf með hvatningu um að gera breytingar á samþykktum svo að mál sem þetta geti fengið umsögn þeirra.