Guðmundur á ferð á Brekkudal fyrir nokkrum árum með sonarsyni sína og nafna, Ragnarsson og Sigurðarson. Gæðingarnir bryðja mélin og vindurinn blæs um fax.
Harmonikukarlarnir og Lóa spila á Tjörn á Þingeyri í attræðisafmæli Sigurjóns G. Jónassonar frá Lokinhömrum 30. nóv. 2005. Guðmundur er hljómsveitarstjóri þeirrar þekktu hljómsveitar og stjórnar henni af léttleika.
Gengið í salinn. Gunnar Bjarnason og Sigurður Fr. Jónsson með dragspil sín tilbúnir til leiks.
Kvennareið hestamanna á Fellasókn á árum áður. Nú heyrir slíkt liðinni tíð af ýmsum ástæðum.
Guðmundur er stoltur af færleikum sínum eins og hestamanna er háttur.
Hér bera menn saman bækur sínar, Ásvaldur harmonikuleikari á Núpi og hljómsveitarstjórinn.
Hreppsnefnd Þingeyrarhrepps þegar allt lék í lyndi. Frá vinstri: Jónas Ólafssson, sveitarstjóri, Guðmundur Grétar Guðmundsson, Guðmundur Ingvarsson, oddviti, Bjarni G. Einarsson og Guðmundur Valgeirsson.
Ragnar Guðmundsson, Raggi á Stöðinni, er hægri hönd föður síns í hestamennskunni. Svanberg Gunnlaugsson í baksýn.
Tveir af frammámönnum Fellasóknar, séra Tómas Jónsson og Gunnlaugur Sigurjónsson, Fellabiskup. Þeir stjórnuðu öllu í sókninni með harðri hendi, ásamt leikmanni nr. 1 en það var auðvitað afmælisbarnið Guðmundur Ingvarsson.
Hópreiðar hestamanna voru nokkuð algengar á tímabili í Fellasókn.
Gott ef þessi var ekki í tilefni af einhverjum kosningum.
Leikmaður númer 1 í essinu sínu.
Hér er séra Tómas Jónsson í Fellasókn greinilega að segja eina af sínum ógleymanlegu sögum. Til vinstri er eiginkona hans, Sigríður Guðrún Steinþórsdóttir og til hægri Sigríður Þórarinsdóttir, eiginkona Sigþórs Gunnarssonar, hestaformanns þáverandi.
Í dag fyllir áttunda tuginn Guðmundur Ingvarsson, fyrrum póst- og símstöðvarstjóri á Þingeyri. Þetta finnst mörgum sjálfsagt nokkuð undarlegt, en verður þó ekki mótmælt. Guðmundur er einn af þeim mönnum sem kom þvert yfir Ísland til að setjast að á Vestfjörðum. Fann hér sína góðu konu og lífshamingju og hefur ekki héðan farið síðan. Hann var alinn upp á Syðra-Lóni á Langanesströndum og á þar ættfesti sína.
Guðmundur kom til Þingeyrar árið 1954 og starfaði fyrst sem verslunarstjóri hjá Kaupfélagi Dýrfirðinga. Síðan gerðist hann starfsmaður hjá Pósti og síma og vann þar upp frá því alla sína starfsævi.
Guðmundur Ingvarsson hefur komið víða við í Dýrafirði í gegnum tíðina. Nestor dýrfirskra hestamanna og harmonikuspilara, forystumaður í sveitarstjórnarmálum og kaupfélagsmálum hefur hann verið og hvarvetna látið gott af sér leiða. Guðmundur er maður glaðlyndur og hrókur alls fagnaðar þegar svo ber við. Hann hefur ánægju af að segja græskulausar gamansögur, bæði af sjálfum sér og öðrum. Ákaflega traustur maður og velviljaður sem býður af sér góðan þokka. Guðmundur er kvæntur Ólöfu Ólafsdóttur, sem er innfæddur Þingeyringur og eiga þau 4 börn.
Ljósmyndirnar tók Hallgrímur Sveinsson.
Hallgrímur Sveinsson.
