15.01.2015 - 06:54 | skutull.is,BIB
Grettir - nýtt íslensk leikverk frumsýnt á hinu forna höfuðbóli í Vatnsfirði
Grettir Ásmundarson í túlkun Elfars Loga
Í tilkynningu frá leikhúsinu eru þeir sem sækja sýninguna hvattir til að klæða sig vel, því engin hiti né ljós er í höll óperunnar. En það verður heitt og notalegt einsog ávallt í Minnsta óperuhúsi heims, þegar fólkið hefur fyllt salinn. Höfundur og leikari er Elfar Logi Hannesson, leikstjóri Víkingur Kristjánsson, leikmynd og búninga gerir Marsibil G. Kristjánsdóttir og tónlistina samdi Guðmundur Hjaltason.
Einleikurinn Grettir er byggður á sögu hins fræga fornkappa, útlaga og vandræðagemsa, Grettis Ásmundarsonar. Elfar Logi Hannesson hefur breytt sögu hans í kraftmikinn einleik. Áður hefur hann og Kómedíuleikhúsið fært upp verk um útlagana Gísla Súrsson og Fjalla-Eyvind, með eftirminnilegum hætti. ,,Grettir sterki Ásmundarson þótti ódæll í uppvexti sínum, fátalaður og óþýður, bellinn bæði í orðum og tiltektum en fríður maður sýnum. Mikill kappi á velli og svo sterkur að hann bar naut á herðum sér. Lagði hann og bjarndýr sem berserki og mera að segja drauginn Glám. Hann var loks útlægur ger," segir í kynningu verksins.
Frumsýningarstaðurinn tengist sögu Grettis, því í Vatnsfirði bjó húsfreyjan Þorbjörg digra, sem bjargaði Gretti úr höndum bænda í Djúpinu sem ætluðu að hengja þennan vandræðamann vegna óspekta og ribbaldaháttar. Þorbjörg tók Gretti úr höndum bænda og hýsti hann um hríð í Vatnsfirði. Fyrir ofan bæinn stendur varða mikil, sem nefnd er Grettisvarða og munnmæli segja að Grettir hafi hlaðið. Þá eru örnefnin Grettistangi og Grettissteinn þar sem kappinn var handsamaður og bjargað í landi Vatnsfjarðar. Við óskum Kómedíuleikhúsinu og Elfari Loga Hannessyni til hamingju með enn eina fjöðrina í leikhúshatt sinn.
