31.07.2015 - 06:57 | skutull.is,BIB
Gönguhátíð í Súðavík og nágrenni á verslunarmannahelgi
Séð niður í Korpudal í Önundarfirði en þangað liggur leiðin af Álftafjarðarheiði. Ljósm.: BIB
Á laugardaginn verður fjölbreytt dagskrá með gönguferðum fyrir alla fjölskylduna. Á laugardagsmorgni verður gengið Sauratinda í leiðsögn Önnu Lindar Ragnarsdóttur og einnig verður fjölskylduganga í Valagil í Seljalandsdal. Klukkan 11 verður lagt af stað í göngu um Álftafjarðarheiði, frá Seljalandi í Álftafirði yfir í Korpudal í Önundarfirði í leiðsögn Ólínu Kjerúlf Þorvarðardóttur og Sigurðar Péturssonar. Á sunnudagsmorgun verður gengið um Folafót í leiðsögn Barða Ingibjartssonar og önnur ganga verður á tindinn Bardaga milli Álftafjarðar og Seyðisfjarðar í leiðsögn Önnu Lindar Ragnarsdóttur. Á hádegi verður farið í selaskoðun í Hvítanesi þar sem Kristján Kristjánsson á Hvítanesi ætlar segja frá selum og lífinu á Hvítanesi.
Dagskránni lýkur á mánudag með morgungöngu á Kofra með Barða Ingibjartssyni. Dagskrá getur riðlast og breyst með veðri og vindum og ef aðstæður á fjöllum verða varasamar verður boðið upp á láglendisgöngur í staðinn. Það eru Súðavíkurhreppur, Göngufélag Súðavíkur og gönguhópurinn Vesen og vergangur sem standa fyrir gönguhelginni í Súðavík um verslunarmannahelgina, einsog fram kom hér á Skutli.is.
Dagskrána má sjá hér á heimasíðu Súðavíkurhrepps.
