Gönguhátíð í Súðavík á verslunarmannahelgi - M.a. gengið á Sjónfríð og í Dýrafjarðarbotn
Gönguhelgi í Súðavík fer fram nú á verslunarmannahelginnni og eru fjölmargar skemmtilegar gönguleiðir í boði.
Framtakið er samvinnuverkefni Súðavíkurhrepps, göngufélags Súðavíkur, gönguklúbbsins Vesens og vergangs og Eyvindar ehf.
Dagskráin hófst í gærkvöldi, fimmtudag, og stendur fram á mánudaginn 1. ágúst.
Í boði verða gönguferðir af öllum gerðum í og við Álftafjörð og nágrenni, en einnig er boðið uppá minigolf og heimsókn í Melrakkasetrið í Súðavík. Þar var einmitt kvöldvaka í gærkvöldi með upplestri og tónleikum.
Í dag, föstudaginn 29. júlí, er á dagskrá síðdegisganga inn í Valagil og önnur upp á Kofra í leiðsögn Barða Ingibjartssonar í Súðavík, en hann er líklega sá maður, lífs eða liðinn, sem oftast hefur gengið á Kofrann.
Laugardagurinn 30. ágúst 2016
verður tekinn snemma með hafragrauti, lifrarpylsu og lýsisskammti á veitingastaðnum Jóni Indíafara. Hægt er að velja um fimm gönguleiðir þennan dag. Í fyrsta lagi ferð úr Hestfirði á Sjónfríð og yfir í Dýrafjarðarbotn. Önnur ferðin er á Sauratinda í leiðsögn Önnu Lindar Ragnarsdóttur. Þriðja ferðin er undir leiðsögn Ólínu Þorvarðardóttur þingmanns og þjóðfræðings með aðstoð Sigurðar Péturssonar sagnfræðings og verður farin gamla þjóðleiðin úr Álftafjarðarbotni yfir í Önundarfjörð. Þá verður einnig í boði sela- og söguskoðun á Hvítanesi í Skötufirði og loks síðdegisganga um þorpið í Súðavík í fylgd Péturs Markan sveitarstjóra. Skemmtanir verða heima í Súðavík, varðeldur og ball í Samkomuhúsinu um kvöldið.
Sunnudagurinn 31. júlí 2016
hefst einnig á grautnum góða á Jóni Indíafara, áður en haldið er á gömlu þjóðleiðina yfir Þóruskarð í botni Engidals í Skutuldsfirði yfir í Seljalandsdal í botni Álftafjarðar. Á sama tíma er hægt að fara í fjölskyldugöngu í Valagil í Seljalandsdal eða á Bardaga sem er tindur á milli Álftafjarðar og Seyðisfjarðar og fær nafn sitt af bardaga tveggja dverga sem vörpuðu björgum. Á hádegi er fjölskylduganga í Heydal í Mjóafirði. Kómedíuleikhúsið verður aftur í Melrakkasetrinu síðdegis og þá er einnig síðdegisganga um Súðavík líkt og á laugardeginum. Um kvöldið verða tónleikar með Skúla Mennska í Súðavíkurkirkju.
Síðasta gangan er á mánudagsmorgninum 1. ágúst 2016
en þá verður farið aftur á Kofra með Barða Ingibjartssyni.
Nánar má sjá dagskrána hér á netinu.
Skipuleggjendur áskilja sér rétt til að breyta áætlun vegna veðurs. Ef aðstæður eru varasamar á fjöllum, verður boðið upp á láglendisgöngur í staðinn.
