Gluggi að samfélaginu í Skóbúðinni á Ísafirði
Í Skóbúðinni hversdagssafni á Ísafirði eru settar upp sýningar sem eru byggðar á persónulegum heimildum núverandi og fyrrverandi íbúa svæðisins. Á safninu gefst fólki tækifæri til að gægjast inn um glugga að samfélaginu fyrir vestan og víðar. Augnablikin eru fönguð sem lýsa upplifunum á og innsýn í hversdagsleikann, sem getur verið mjög lýsandi fyrir mannlífið - tíminn milli stórviðburða. Björg Sveinbjörnsdóttir og Vaida Bražiūnaitė eru forsprakkar og umsjónarkonur Skóbúðarinnar.
„Fólkið sem kemur inn tengir oft við sitt eigið líf og nálgast þar af leiðandi mun stærri heim,“ segir Björg. „Það er ekki bara það sem við sjáum á safninu sem er „til sýnis“ heldur líka það sem fólk hefur upplifað; tengingin, tilfinning og skynjun eru í raun meginatriðin.“
Björg segir með markaðssetningu landsins verði til ákveðin fjarlægð milli ferðamanna og íbúa og íbúar landsins jafnvel markaðssettir sem „merkilegir.“ „En fólk sem er að ferðast hefur þrá til að tengjast fólki og svæðinu og þá þurfum við ekki að vera að breyta okkur í álfa eða fígúrur heldur finna flötinn þar sem allir tengjast,“ segir Björg. Hversdagurinn sé mjög svipaður á milli samfélaga. Hún segir marga gesti safnsins upplifa að hafa fengið að kíkja inn um glugga á samfélaginu.
Halla Ólafsdóttir hitti Björgu í Skóbúðinni sem sagði henni frá sýningunum sem eru nú í gangi á safninu, hvernig safnið er tilkomið og markmið þess en jafnframt örlítið frá samtímaheimildasöfnun safnsins sem að gestir þess taka þátt í og er til sýnis á samfélagsmiðlum. er til sýnis á samfélagsmiðlum.
Í umfjölluninni heyrist jafnframt í Úlfi Júlíussyni, Ninu Ivanaova og Páli Gunnari Loftssyni sem les.
